नाशिक : वणी - नाशिक रस्त्यावरील ओझरखेड धरण कालव्याच्या कठड्याला कार आढळून २ युवक ठार तर दोघे जखमी झाले आहे. मंगळवारी (ता.२२) रात्री नऊ वाजेच्या सुमारास नाशिकहून नांदुरी येथे जाणाऱ्या कार चालकाचे वाहनावरील नियंत्रण सुटून ओझरखेड धरणाच्या पुलाच्या कठड्याला जोरदार धडक देवून पलटी झाली.

अपघातात २ युवक ठार तर दोघे जखमी

सनी ज्ञानेश्वर मोरे (वय १८) रा. नांदुरी हा महाविद्यालयीन  विद्यार्थी जागीच ठार झाला आहे. तर मानिक सुरेश राऊत, (वय २१) रा. नांदुरी, जगन वामन चव्हाण, (वय २५) रा. हिरीडपाडा बोरगांव व हंसराज भगवान गायकवाड (वय १२) रा. बोरगाव हे जखमी झाले आहे. जखमींना ग्रामिण रुग्णालयात उपचार करुन नाशिक येथे पुढील उपचारासाठी नेत असताना गंभीर जखमी असलेल्या जगन चव्हाण यांचेही रस्त्यातच निधन झाले. जखमींवर वणी ग्रामिण रुग्णालयात वैद्यकिय अधिकारी डॉ. मोरे, डॉ. प्रकाश देशमुख यांनी उपचार केले.  मयत सनी मोरे व जखमी मानिक राऊत हे दिवाळीची खरेदीसाठी नाशिक येथे गेले होते. सीबीएस बसस्थानकावर एसटीने नांदुरी येथे येणार होते, मात्र आेळखीचे वाहन मिळाल्याने ते महिंद्रा कारने नांदूरी येथे परतत होते.