धडगाव (जि. नंदुरबार) : जगातील सर्वात उंच शिखर असलेले माऊंट एव्हरेस्ट सर करण्यासाठी अक्कलकुवा तालुक्यातील बालाघाट येथील गिर्यारोहक अनिल वसावे याची निवड झाली आहे. या निवडी बद्दल खासदार डॉ. हीना गावित यांनी अनिल वसावेंचा सत्कार केला.

एव्हरेस्ट वीर आनंद बनसोडे यांच्या मार्गदर्शनाखाली अनिल वसावेंची माऊंट एव्हरेस्ट वर चढाई करण्यासाठी निवड झाली. ७ एप्रिल २०२३ ते ७ जून २०२३ या कालावधीत अनिल वसावे ही मोहीम सर करणार आहे. त्यामुळे खा. डॉ. हीना गावित यांनी अनिल वसावेंचा सत्कार केला. अक्कलकुवा सारख्या अतिदुर्गम भागातील बालाघाट या छोट्याशा गावातून पुढे येत अनिल वसावे या युवकाने अनेक आंतरराष्ट्रीय मोहीमा फतेह केल्या आहेत. अशी आंतरराष्ट्रीय कामगिरी करणारा अनिल वसावे हा पहिला आदिवासी युवक असून, त्याने समाजाचे आणि देशाचे नाव उंचावले आहे असे गौरवोद्गार डॉ. हीना गावित यांनी सत्कार प्रसंगी काढले. तसेच एव्हरेस्ट मोहीमेसाठी आवश्यक ते सहकार्य करण्याचे आश्वासन दिले.