इगतपुरी - मध्य रेल्वेच्या मुंबईहून गोरखपूरला जाणाऱ्या (डाउन) अंत्योदय एक्‍स्प्रेसच्या एका डब्याचे चाक कसारा घाटात गुरुवारी (ता. १८) पहाटे चारच्या सुमारास रुळावरून घसरले. मोठी दुर्घटना टळली असली, तरी घाटमाथ्याच्या वळणावरील ‘भीमा २’ पुलावर हा अपघात घडल्याने, प्रवासी भयभीत झाले. यामुळे रेल्वेसेवा काही काळ विस्कळित झाली होती.

या अपघातामुळे राज्यराणी एक्‍स्प्रेस रद्द करण्यात आली. तसेच दोन्ही मार्गांवरील गाड्या एक ते दीड तास उशिराने धावत होत्या. मुंबईहून गोरखपूरला जाणारी अंत्योदय एक्‍स्प्रेसने (क्रमांक १२५९८) कसारा रेल्वे स्थानक सोडल्यानंतर घाटातील ब्रिटिशकालीन भीमा २ पुलावर येताच मोठा आवाज झाल्याने साखरझोपेत असलेले प्रवासी जागे झाले. गाडीच्या शेवटून दुसरा डबा रुळावरून घसरल्याचे लक्षात येताच चालकाने सतर्कता दाखवत गाडी थांबवली. मात्र अपघातामुळे प्रवाशांमध्ये गोंधळ उडाला. रेल्वे प्रशासनाला घटनेची माहिती समजताच आपत्कालीन यंत्रणेला बोलविण्यात आले.