नवापूर : पोल्ट्रीफार्मच्या कोंबड्यांचा मृत्यू संसर्गजन्य आजाराने होत असल्याने जिल्हाधिकाऱ्यांना तोंडी आदेशाने पालिका प्रशासनाने शहरातील चिकन व अंडी विक्री करण्यास मनाई केली. बावीस पोल्ट्रीफार्मला प्रतिबंधात्मक कारवाई म्हणून सील करण्याचे आदेश पारित केले. तीन दिवसांत सात हजार कोंबड्यांचा संसर्गजन्य आजाराने मृत्यू झाल्याने प्रशासन कामाला लागले आहे. 

आवश्य वाचा- धुळ्यातील अनधिकृत होर्डींग काढण्यासाठी थेट पोलीस अधिक्षक उतरले रस्त्यावर !
 

तालुक्यातील पोल्ट्रीफार्मच्या कोंबड्यांचा हजारोंच्या संख्येने मृत्यू संसर्गजन्य आजाराने होत आहे. या अनुषंगाने जिल्हा प्रशासनाने तालुक्यातील अधिकाऱ्यांची आढावा बैठक घेऊन उपाययोजनांसंदर्भात सूचना केल्या. जिल्हाधिकारी डॉ. राजेंद्र भारूड, प्रांताधिकारी वसुमना पंत, पोलिस अधीक्षक महेंद्र पंडित, तहसीलदार मंदार कुलकर्णी, पोलिस निरीक्षक बाळासाहेब भापकर यांनी चार सील केलेल्या डायमंड, परवेज पठाण आणि व्होरा या पोल्ट्रीफार्मची पाहणी केली. पालिका प्रशासनाला जिल्हाधिकाऱ्यांनी दिलेल्या आदेशानुसार शुक्रवारी आरोग्य निरीक्षक राजेंद्र चव्हाण यांनी शहरातील चिकन व अंडी विक्रेत्यांना विक्री करण्यास मनाई केली. दरम्‍यान, ‍शहरात बर्ड फ्लू नसतानाही आमच्या व्यवसायावर बंदी का, असा सवाल उपस्थित करत चिकन व अंडी विक्रेत्यांनी पोलिस ठाण्यात गर्दी केली होती. 

आवर्जून वाचा- धुळ्यात इंधन, वीजप्रश्‍नी सेना- भाजप आमनेसामेने
 

शुक्रवारी साडेतीन हजार कोंबड्यांचा मृत्यू 
जिल्हाधिकाऱ्यांनी नवापूर शहरातील एक किलोमीटर परिघातील २२ कुक्कुटपालन पालन व्यवसायाला प्रतिबंधनात्मक उपाययोजना म्हणून सील करण्याचे आदेश तहसीलदारांना दिले आहेत. सर्व ठिकाणी पोलिस बंदोबस्त ठेवला आहे. तालुक्यातील सर्व पोल्ट्रीफार्ममध्ये नऊ लाख पक्षी आहेत. पैकी शुक्रवारी साडेतीन हजार कोंबड्यांचा मृत्यू झाला. तीन दिवसांत सात हजार कोंबड्यांचा संसर्गजन्य आजाराने मृत्यू झाला आहे.  

संपादन- भूषण श्रीखंडे