नवापूर : शहरासह तालुक्यातील पोल्ट्रीफार्मच्या हजारो कोंबड्यांचा मृत्यू संसर्गजन्य रोगाने होत असल्याचे निदर्शनास आल्याने प्रशासन खडबडून जागे झाले आहे. प्रांताधिकाऱ्यांसह पशुसंवर्धन विभागाच्या आयुक्तांनी भेट दिली. कुक्कुटपालन व्यावसायिकांची बैठक घेऊन खबरदारी घेण्याच्या सूचना दिल्या. 
दरम्यान, पशुसंवर्धन विभागाच्या पथकाने मृत कोंबड्यांचे नमुने पुणे व भोपाळला पाठविले आहेत. अहवाल येईपर्यंत सतर्कता म्हणून जिल्हाधिकारी डॉ राजेंद्र भारूड यांनी पोल्ट्रीफार्मच्या आजूबाजूच्या २२ गावांना हाय अलर्ट जारी केला आहे. 

आवश्य वाचा- साहित्य-संस्कृतीच्या धनापुढे टाटा, बिर्ला, अदानी फिके..! 
 

कुक्कुटपालन केंद्रांची पाहणी व चौकशी सुरू आहे. नंदुरबार जिल्हाधिकाऱ्यांच्या आदेशानुसार गुरुवारी नवापूर तालुक्यातील पोल्ट्रीफार्मला नाशिकच्या पशुसंवर्धन विभागाचे प्रादेशिक सहआयुक्त डॉ. बाबूराव तरवाडे, सहाय्यक आयुक्त डॉ. शहाजी देशमुख, सहाय्यक आयुक्त डॉ. जी. आर. पाटील, पशुधन विकास अधिकारी डॉ. एस. बी. पाडवी, डॉ. अमित पाटील, डॉ. योगेश गायित, डॉ. के. डी. पाटील, जिल्हा पशुसंवर्धन उपायुक्त डॉ. यू. डी. पाटील यांनी भेट देऊन चौकशी केली. चौकशीसाठी आलेल्या अधिकाऱ्यांनी मृत कोंबड्याची व्हिलेवाट कशी लावावी यावर मार्गदर्शक सूचना केल्या. कोंबड्यांचा मृत्यूबाबत माहिती लपविणाऱ्या पोल्ट्रीमालकावर कारवाई होण्याची शक्यता वर्तविली जात आहे. 

आवर्जून वाचा- राज्यपालांसमोर भाजपच्या लोकप्रतिनिधींचे ‘पॉलिटिकल रडगाणे' ! 

प्रांताधिकारी वसुमना पंत यांनी तहसील कार्यालयात सर्व पोल्ट्री व्यावसायिकांची बैठक घेतली. कोंबड्यांचा मृत्यू कोणत्या आजाराने झाला, हे निष्पन्न होत नाही तोपर्यंत खबरदारी घ्यावी. कुठल्याही प्रकारची बेपर्वाई प्रशासन खपवून घेणार नाही. संसर्गजन्य आजाराबाबत हलगर्जी व माहिती लपविली तर कारवाई करण्यात येईल, असे सांगितले. तहसीलदार मंदार कुलकर्णी, पशुसंवर्धन विभागाचे अधिकारी, २४ पोल्ट्री व्यावसायिक उपस्थित होते.  

 
संपादन- भूषण श्रीखंडे