नवापूर: तालुक्यात बर्ड फ्लूचा शिरकाव झाल्यानंतर बाधित दहा कुक्कुटपालन केंद्रातील पक्षी शास्त्रोक्त पद्धतीने नष्ट करण्याची प्रक्रिया राबवण्यात येत आहे. मंगळवारी (ता.९) रात्री उशिरा आलेल्या आठ पोल्ट्री फार्मचे अहवाल पॉझिटिव्ह आले. आत्तापर्यंत १६ पोल्ट्री फार्मचे अहवाल पॉझिटिव्ह आले असून, त्यापैकी दहा पोल्ट्री फार्मच्या पक्ष्यांचे किलिंगचे काम बुधवारी सायंकाळी पूर्ण झाले. बुधवारी प्रशासनाने तालुक्यातील सर्व पोल्ट्री फार्मचे कोंबडी खाद्याचे गुदाम सील केल्याची माहिती तहसीलदार मंदार कुलकर्णी यांनी दिली. 

मंगळवारी रात्री उशिरा आलेल्या अहवालात लहान चिंचपाडा व पिंपळनेर रस्त्यावरील मुस्तफा १ व २, श्रेयश, सफा, न्यू शांती, एफ-सन्स, जस व शाहीन या आठ पोल्ट्री फार्मचा अहवाल पॉझिटिव्ह आले आहेत. आत्तापर्यंत सोळा पोल्ट्री फार्मच्या कोंबड्यांना बर्ड फ्लूची लागण झाली आहे. लागण झालेल्या पोल्ट्री फार्मच्या आजूबाजूच्या एक किलोमीटर परिघातील घरगुती पालन केलेल्या कोंबड्या, बदक व इतर पाळीव पक्षी जमा करण्याचे आदेश देण्यात आले आहेत. जिल्हाधिकारी डॉ. राजेंद्र भारूड यांनी दिलेल्या आदेशानुसार घरगुती पक्ष्यांच्या मालकांना शासन नियमानुसार भरपाई मिळणार आहे. नागरिकांनी महसूल विभागाच्या कर्मचाऱ्यांकडे आपल्या कोंबड्या, बदक पाळीव पक्षी देताना सोबत आधारकार्ड व इतर आवश्यक माहिती द्यावी, जेणेकरून भरपाई मिळताना अडचणी निर्माण होणार नाही, असे तहसीलदार श्री. कुलकर्णी यांनी सांगितले. 

सव्वातीन लाख कोंबड्याचे किलिंग 
आदेशानंतर पहिल्या दिवशी ४० हजार कुक्कुट पक्षी नष्ट केले. दुसऱ्या दिवशी एक लाख ५ हजार ३०३, तिसऱ्या दिवशी ८४ हजार ७८७, तर बुधवारी चौथ्या दिवशी पालावाला पोल्ट्री फार्मच्या ५९ हजार सहाशे, मुस्तफा- एकमध्ये २३ हजार २५१, श्रेयस पोल्ट्रीच्या चार हजार २००, तर न्यू डायमंडमध्ये २५ हजार २४१ अशा एकूण एक लाख १२ हजार २९२ पक्ष्यांचे किलिंग झाले. आजपर्यंत तीन लाख २८ हजार २५१ पक्ष्यांचे किलिंगचे काम पूर्ण झाले आहे. 
 

संपादन- भूषण श्रीखंडे