Dhule News : महापालिकेच्या हद्दवाढ क्षेत्रातील रहिवाशांसाठी महापालिका आयुक्तांनी मालमत्ता करावरील शास्ती माफ करण्याचा निर्णय अखेर घेतला. पहिले तीन महिने शंभर टक्के शास्ती माफ होईल व त्यानंतर योजनेचा लाभ घेतला तर साधारण दीड महिना ५० टक्के शास्तीमाफीचा लाभ मिळू शकणार आहे.

या निर्णयामुळे एका अर्थाने हद्दवाढ क्षेत्रातील रहिवाशांना दिवाळी गिफ्ट मिळाले आहे. हद्दवाढ क्षेत्रात ३३ हजार मालमत्ता आहेत. यातील ज्यांनी अद्याप कर भरलेला नसेल त्यांना याचा लाभ मिळू शकरणार आहे.(Commissioner decision Diwali gift' to residents of border dhule news )

महापालिका हद्दवाढ क्षेत्रातील अकरा गावांमध्ये करवसुलीच्या अनुषंगाने असंख्य तक्रारी व रोष आहे. कोणत्याही प्रकारच्या सोयी-सुविधा नसताना महापालिकेकडून वाढीव कर लादण्यात आल्याची ओरड आहे. नागरिकांसह नगरसेवक, राजकीय पदाधिकाऱ्यांनी याबाबत वेळोवेळी तक्रारी केल्या. दरम्यान, या प्रश्‍नावर अद्याप काहीही तोडगा निघालेला नाही.

दरम्यान, किमान हद्दवाढ क्षेत्रासाठी शास्तीमाफी योजना जाहीर करून दिलासा द्यावा, अशी मागणी पुढे आली. या मागणीवर बुधवारी (ता. ८) महासभेत चर्चाही झाली. महासभेतील चर्चा व कार्यालयीन टिपणी याचा विचार करून आयुक्त अमिता दगडे-पाटील यांनी हद्दवाढ क्षेत्रासाठी शास्तीमाफी योजना अखेर जाहीर केली आहे.

या कालावधीत लाभ

१६ नोव्हेंबर २०२३ ते १५ फेब्रुवारी २०२४ दरम्यान १०० टक्के शास्तीमाफीचा लाभ घेता येईल. त्यानंतर १६ फेब्रुवारी २०२४ ते ३१ मार्च २०२४ दरम्यान मात्र ५० टक्के शास्तीमाफी मिळेल. हद्दवाढ क्षेत्रातील रहिवाशांनी योजनेचा लाभ घ्यावा, मालमत्ता कराची संपूर्ण रक्कम भरून महापालिकेस सहकार्य करावे, असे आवाहन महापौर प्रतिभा चौधरी, आयुक्त श्रीमती दगडे-पाटील यांनी केले आहे.

हद्दवाढीत ३३ हजार मालमत्ता

हद्दवाढ क्षेत्रात वलवाडी, भोकर, नकाणे, महिंदळे, वरखेडी, अवधान, चितोड, नगार बुद्रुक, मोराणे, बाळापूर, पिंपरी या गावांचा समावेश आहे. या अकरा गावांमध्ये सुमारे ३३ हजार मालमत्ता आहेत. त्यामुळे यातील ज्या थकबाकीदार मालमत्ताधारकांनी अद्याप मालमत्ता कर अदा केला नसेल त्यांना या शास्तीमाफीचा लाभ घेता येणार आहे.