Dhule Cotton Disease : दीड महिन्यापासून पावसाने दडी मारली होती. गेल्या चार दिवसांपासून परिसरात पाऊस जोरदार हजेरी लावत आहे. त्यामुळे शिंदखेडा तालुक्यातील ऐन वेचणीवर आलेल्या कपाशी पिकाला फटका बसला आहे.

दरम्यान, लाल्याचा प्रादुर्भाव वाढल्याने हजारो हेक्टर कापूस उत्पादक शेतकऱ्यांचा हातातोंडाशी आलेला घास वाया जाण्याची भीती निर्माण झाली आहे.

तालुक्यात सुमारे २० हजार हेक्टरपेक्षा जास्त क्षेत्रावर बागायतदार शेतकऱ्यांनी, ५० हजारांवर कोरडवाहू शेतकऱ्यांनी कपाशीची लागवड केली आहे.

(लोकल ते ग्लोबल लेटेस्ट अपडेट मिळवा सकाळच्या व्हॉट्सअप चॅनेलवर फक्त एका क्लिकमध्ये)

जेमतेम विहिरीच्या पाण्यावर बागायतदार शेतकऱ्यांनी लहान बाळाप्रमाणे देखरेख करून कपाशीचे पीक उभे केले. गेल्या तीन साडेतीन महिन्यांच्या कालावधीत पावसाचे प्रमाण अत्यल्प होते.

बी-बियाणे, खते, फवारणी, निंदणी, कोळपणीसाठी शेतकऱ्यांनी भांडवल व्याजदराने उपलब्ध केले. दरम्यान, गेल्या दीड महिन्यापासून पावसाने दडी मारली होती. त्यामुळे दुष्काळीसदृश परिस्थितीत निर्माण झाली आहे. आता चार दिवसांपासून पाऊस रोज दमदार हजेरी लावत आहे. सध्या कापूस काढणीला आला आहे.

कापसाची बोंडे पक्की झाली आहेत. काही शेतकऱ्यांचा कापूस वेचणीला आला आहे. पावसामुळे बोंडे काळी पडू लागली आहेत. वेचणीला आलेला कापूस खराब होऊ लागला आहे, तर लाल्या रोगाचा प्रादुर्भावाही वाढला आहे.

नवीन फुलभौरीची गळ होत वाढ खुंटली आहे. त्यामुळे शेतकरी दुहेरी संकटात सापडला आहे. बागायतदार कापूस उत्पादक शेतकऱ्यांना पाऊस येऊनही नुकसान सहन करावे लागणार आहे, तर कोरडवाहू कपाशीची दीड महिन्यापासून पाऊस नसल्याने वाढ खुंटली आहे.

नदी-नाले अद्याप कोरडेठाक पडले आहेत. खरीप वाया गेला तर रब्बीसाठी जोरदार पावसाची आवश्यकता आहेच; परंतु सध्या काढणीस आलेल्या कापसाचे होणाऱ्या पावसामुळे नुकसान सहन करावे लागत आहे.

"विमाधारक शेतकऱ्यांना हंगामातील प्रतिकूल परिस्थितीमुळे झालेले नुकसानभरपाईसाठी सर्वेक्षण केले जात आहे. २५ टक्के अग्रिम रकमेसाठी अहवाल तयार करण्याचे काम अंतिम टप्प्यात आहे. कपाशी पिकावरील लाल्या रोग, कीडनियंत्रणासाठी शास्त्रज्ञांमार्फत मार्गदर्शन कळविले जाईल." -एस. पी. तवर, तालुका कृषी अधिकारी, शिंदखेडा