Dhule Crime News : अल्पवयीन मुलीला फूस लावून पळवून नेत तिच्याशी विवाह केल्याच्या प्रकरणात युवकाविरोधात शहर पोलिस ठाण्यात गुन्हा दाखल झाला.

संशयित युवकाला अटक करण्यात आली असून, पीडित मुलीची निरीक्षणगृहात रवानगी करण्यात आली. (crime against youth for abducting and marrying minor girl dhule crime news)

मुलीच्या वडिलांनी याबाबत फिर्याद दिली. त्यांची मुलगी १२ डिसेंबरला सकाळी साडेनऊला कॉलेजला जात असल्याचे सांगून घरातून निघून गेली. ती उशिरापर्यंत न परतल्याने कुटुंबीयांनी नातलगांकडे व परिसरात शोध घेतला. मात्र ती आढळली नाही. शहर पोलिस ठाण्यात मुलीच्या पालकांनी माहिती दिल्याने बेपत्ता नोंद करण्यात आली.

दरम्यान, बुधवारी (ता. ९) शहर पोलिस ठाण्यात पोलिसांनी मुलीच्या वडिलांना बोलावून माहिती दिल्यानंतर तिने गौरव तथा शुभम नितीन पाटील (वय २३, रा. विखरण, ता. शिरपूर) याच्याशी लग्न केल्याची माहिती मिळाली.

मुलीच्या वडिलांनी मुलीचा जन्मदाखला पोलिसांसमोर सादर केल्यानंतर तिचे वय १८ वर्षांपेक्षा कमी असल्याचे निष्पन्न झाले.

त्यामुळे अल्पवयीन मुलीस फूस लावून पळवून नेत तिच्याशी लग्न केल्याच्या संशयावरून संशयित गौरव तथा शुभम नितीन पाटील याच्याविरोधात शहर पोलिस ठाण्यात बाललैंगिक अत्याचार व बालविवाह प्रतिबंध अधिनियमानुसार गुन्हा दाखल करण्यात आला. रात्री आठला संशयिताला अटक करण्यात आली. पीडितेला धुळे येथील निरीक्षणगृहात रवाना करण्यात आले.