Dhule News : आगामी निवडणुकांच्या पार्श्‍वभूमीवर पोलिसांनी सोमवारी (ता. ४) सायंकाळी सात ते रात्री दहादरम्यान जिल्ह्यात नाकाबंदी व कोम्बिंग ऑपरेशन राबवून असामाजिक घटकांवर कारवाया केल्या. २९ ठिकाणी नाकाबंदी करत तब्बल ७२६ वाहनांची तपासणी करण्यात आली. मोटार वाहन कायद्यान्वये १३३ केसेस करण्यात आल्या. संबंधितांकडून ७५ हजारांवर दंडही वसूल करण्यात आला.

पोलिस अधीक्षक श्रीकांत धिवरे यांच्या मार्गदर्शनाखाली जिल्हाभरात ही मोहीम राबविण्यात आली.(Dhule Blockade at 29 places in Dhule district by police)

या मोहिमेत २१ पोलिस अधिकारी, ११४ पोलिस अंमलदार व ७० होमगार्डस सहभागी झाले. या अधिकारी, कर्मचाऱ्यांनी जिल्हाभरात २९ ठिकाणी नाकाबंदी करून ३७६ दुचाकी व ३५० चारचाकी वाहनांची तपासणी केली. यात मोटार वाहन कायद्यान्वये विविध नियमांचे उल्लंघन केल्याप्रकरणी १३३ केसेस करून संबंधितांकडून ७५ हजार ८०० रुपये दंड वसूल करण्यात आला.

मद्यपींवरही कारवाई

वाहनांच्या तपासणीबरोबरच चार सोडाविक्री गाड्या, मोकळी मैदाने, नदीकाठावरील परिसरात मद्य प्राशन करणाऱ्या तीन जणांवर कारवाई करण्यात आली. (latest marathi news)

तसेच एकूण ११ बार, ढाबे, हॉटेल, लॉजेस व गेस्ट हाउसचीही तपासणी करण्यात आली. या मोहिमेदरम्यान अपर पोलिस अधीक्षक किशोर काळे यांनी नाकाबंदीच्या ठिकाणी भेट दिली. सहाय्यक पोलिस अधीक्षक एस. ऋषिकेश रेड्डी, पोलिस उपअधीक्षक साजन सोनवणे, सचिन हिरे यांनी त्यांच्या उपविभागात नियंत्रण ठेवून नाकाबंदीच्या ठिकाणांना भेटी दिल्या.

दरम्यान, यापूढेही निवडणुका, सण-उत्सवांच्या अनुषंगाने वेळोवेळी नाकाबंदी, कोम्बिंग व ऑलआउट ऑपरेशन राबविण्यात येईल. ही मोहीम आणखी प्रभावी करण्यात येईल, असे पोलिस अधीक्षक धिवरे यांनी सांगितले.