साक्री : म्हसदी (ता. साक्री) येथील महिला ग्रामपंचायत सदस्यांच्या वॉर्डातील शाळेत संरक्षण भिंत, पेव्हर ब्लॉक व मुला-मुलींसाठी सुलभ शौचालय कामास मंजुरी मिळविण्यासाठी तक्रारदाराकडून पन्नास हजारांची लाच स्वीकारताना म्हसदी येथील ग्रामसेवक मेघश्याम रोहिदास बोरसे यास गुरुवारी (ता. २५) लाचलुचपत प्रतिबंधक विभागाच्या पथकाने पकडले. (Dhule Bribe Gramsevak Borse arrested while accepting bribe of 50 thousand)

म्हसदी ग्रामपंचायत कार्यालयात धुळे लाचलुचपत प्रतिबंधक विभागाच्या पथकाने ही कारवाई केली. म्हसदी येथील ग्रामपंचायत सदस्यांच्या पतीने त्यांच्या वॉर्डात विकासकाम मंजूर होण्यासाठी सरपंच तसेच ग्रामसेवक मेघश्याम बोरसे यांच्याकडे वेळोवेळी भेटून पाठपुरावा केला होता. तक्रारदार व त्यांच्या पत्नीने ग्रामपंचायत कार्यालयात ग्रामसेवक बोरसे यांची भेट घेऊन पत्नी सदस्य असलेल्या वॉर्डातील ऊर्दू शाळेत संरक्षण भिंत.

शाळेच्या आवारात पेव्हर ब्लॉक व शाळेच्या मुला-मुलींसाठी सुलभ शौचालयाच्या कामास मंजुरी मिळावी, यासाठी अर्जवजा विनंती केली होती. यावर ग्रामसेवक बोरसे याने या कामाचे अंदाजपत्रकात १२ लाख रुपये किमतीच्या २० टक्केप्रमाणे दोन लाख ४० हजार रुपयांनी काम घेणाऱ्या इच्छुक ठेकेदाराकडून आगाऊ कमिशन घेऊन द्यावे लागेल.

असे तक्रारदारांना सांगितले होते. तक्रारदारांना ग्रामसेवक बोरसे यांना त्यांच्या मागणीप्रमाणे लाच देण्याची इच्छा नसल्याने त्यांनी या अनुषंगाने ४ मार्चला धुळे लाचलुचपत प्रतिबंधक विभागाकडे तक्रार दिली होती. (Latest Marathi News)

७ मार्चला तक्रारीच्या पडताळणीदरम्यान ग्रामसेवक बोरसे याने तक्रारदाराकडे तडजोडीअंती दोन लाखांची मागणी करून या रकमेपैकी ५० हजारांचा पहिला हप्ता स्वीकारण्याचे मान्य केले. या अनुषंगाने गुरुवारी (ता. २५) ग्रामसेवक बोरसे याने तक्रारदाराकडे दोन लाखांपैकी पहिला हप्ता ५० हजार रुपये म्हसदी ग्रामपंचायत कार्यालयात स्वीकारत असताना त्यास लाचलुचपत प्रतिबंधक विभागाच्या पथकाने ताब्यात घेतले.

ग्रामसेवक बोरसे यांच्याविरुद्ध साक्री पोलिस ठाण्यात भ्रष्टाचार प्रतिबंधक अधिनियम कलमान्वये गुन्हा दाखल करण्याचे काम सुरू होते. धुळे लाचलुचपत प्रतिबंधक विभागाचे उपअधीक्षक अभिषेक पाटील यांच्या मार्गदर्शनाखाली पोलिस निरीक्षक रूपाली खांडवी, हेमंत बेंडाळे, तसेच राजन कदम, मुकेश अहिरे, प्रशांत बागूल, संतोष पावरा, रामदास बारेला, प्रवीण मोरे, प्रवीण पाटील, मकरंद पाटील, सुधीर मोरे व जगदीश बडगुजर यांच्या पथकाने ही कारवाई केली.