Dhule Crime News : मुंबई-आग्रा महामार्गावरील लळिंग (ता. धुळे) शिवारात संशयित दोघांनी कॉम्प्रेसर मशिनच्या पाईपद्वारे गुद्‍द्वारात हवा भरून १४ वर्षीय बालकाचा खून केला. ही संतापजनक घटना गुरुवारी (ता. ६) सकाळी घडली. मोहम्मद खालीक मोहम्मद गनीब (रा. सुखासन बोरीयारी, जि. कटियार, बिहार) असे मृताचे नाव आहे. या प्रकरणी दोन संशयितांविरुद्ध मोहाडी पोलिस ठाण्यात खुनाचा गुन्हा दाखल करून त्यांना अटक केली. (Brutal killing of child Two suspects arrested)

टायर पंक्चर दुकानचालक मोहम्मद मुजाहिद आलम (रा. मोहना चांदपूर, ता. मोमीन टोला, जि. पटीहार, बिहार, ह.मु. सिटी पॉइंट हॉटेलजवळ, लळिंग शिवार, ता. धुळे) यांच्या फिर्यादीनुसार गुरुवारी (ता. ६) सकाळी साडेदहा ते अकराच्या सुमारास हॉटेल सिटी पॉइंटच्या आवारातील फेमस टायर हाउस येथे शिवाजी लक्ष्मण सुळे (रा. शिंदेनगर, मोहाडी) याने मोहम्मद खालीक याला पकडून ठेवले. (latest marathi news)

रोहित राजू चंद्रवंशी (रा. लळिंग, ता. धुळे) याने टायर पंक्चर दुकानासमोर ठेवलेल्या कॉम्प्रेसर मशिनचा पाइप सुरू करून खालीकच्या गुद्‍द्वारास लावल्याने मशिनमधील हवा पाइपाद्वारे त्याच्या पोटात गेली. परिणामी, खालीकच्या पोटातील अवयवांना गंभीर दुखापत होऊन त्याचा मृत्यू झाला. त्याच्या मृत्यूस दोघे कारणीभूत आहेत. त्यावरून संशयित दोघांविरुद्ध मोहाडी पोलिस ठाण्यात खुनासह पॉक्सोच्या कलमान्वये गुन्हा दाखल झाला. पोलिसांनी मध्यरात्री दोन्ही संशयितांना अटक केली.