Dhule Crime News : शहराच्या दक्षिणेला लळिंग (ता. धुळे) वनक्षेत्रातील कुरणात हवेत गोळ्या झाडण्याची बंदूक घेऊन दोन जण फिरत असल्याचे आढळले. वनपाल नितीन सांगळे यांनी त्यांची चौकशी करण्याचा प्रयत्न केला; परंतु दुचाकीस्वार दोघे तरुण झटापटी करून पळून गेले. मात्र, त्यांच्याकडे असलेली बंदूक वनपाल सांगळे यांच्या ताब्यात आली. या घटनेनंतर वन विभागाच्या पथकाने कुरणात संशयित तरुणांचा शोध घेण्याचा प्रयत्न केला. (two who walking around with gun ran away after fight at Laling Kuran)

काही वर्षांत नागरिकांना वनसंवर्धनाचे महत्त्व लक्षात आले. गेल्या काही वर्षांपासून सामाजिक संस्थांचे सभासद दर वर्षी पावसाळा सुरू होण्यापूर्वी लळिंग कुरणात वृक्षारोपण करतात. अलीकडेच निरनिराळ्या क्षेत्रातील नागरिकांनी लळिंग कुरणात २५ हजारांवर बिया असलेले मातीचे गोळे रोपले. धाराऊ वृक्ष समितीने काही प्रमाणात वृक्षारोपण केले. वृक्षसंवर्धनामुळे वनक्षेत्रात वन्यपशु-पक्ष्यांची संख्या वाढली आहे. बिबटे, रानगवे, हरीण, ससे, साळिंदर यांसारखे प्राणी लळिंग कुरणात वाढीस लागले आहेत.

एकीकडे निसर्गाबाबत आस्था असणारे असताना दुसरीकडे निसर्गाला हानी पोचविणारेदेखील आहेत. दोन दिवसांपूर्वी लळिंग कुरणात दोन तरुण दुचाकीने आल्याचे वनपाल सांगळे यांच्या लक्षात आले. त्यांनी दोन्ही तरुणांची चौकशी केली. दुचाकीवर मागे बसलेल्या तरुणाच्या हातात पिशवी होती. (latest marathi news)

सांगळे यांनी पिवशीत काय आहे, अशी विचारणा केली. तेव्हा तरुणांनी सांगळे यांच्याशी झटापट करीत पळ काढला. पिवशीतील हवेत गोळ्या मारणारी बंदूक खाली पडली. सांगळे यांनी ती ताब्यात घेतली. याबाबत वनपरिक्षेत्र अधिकारी भूषण वाघ यांना सांगळे यांनी माहिती दिली. संशयितांचा शोध घेऊन त्यांच्यावर वन कायदा १९७२ नुसार कारवाई केली जाणार असल्याचे वन विभागाने सांगितले.