Dhule National Lok Adalat : राष्ट्रीय लोकअदालतीमध्ये मालमत्ता कराच्या वसुलीतून महापालिकेच्या तिजोरीत शनिवारी (ता.२८) ८४ लाख ७६ हजार रुपये जमा झाले. दरम्यान, लोकअदालतीच्या पार्श्‍वभूमीवर धुळे महापालिकेने ९ ते २८ सप्टेंबरदरम्यान शंभर टक्के शास्ती माफी योजना राबविली. या कालावधीत एकूण चार कोटी सहा लाख रुपये कर वसुली झाली. त्यामुळे लोकअदालतीचा कर वसुलीसाठी महापालिकेला थोडाफार का होईना दिलासा मिळाला. (Dhule Four crores in municipal treasury)

मालमत्ता कर, पाणीपट्टीपोटी महापालिकेचे कोट्यवधी रुपये थकीत आहेत. ही थकबाकी वसूल करताना महापालिकेच्या यंत्रणेला नाकीनऊ येत आहेत. सुधारित कर आकारणीच्या नोटिसा वाटप झाल्यानंतर करात वाढ झाल्याची ओरड आहे. त्यानंतर काही लोकप्रतिनिधींनी शासनस्तरावर निवेदने, बैठका लावून कर आकारणीत दिलासा दिल्याचा मिळणार असल्याचा दावा केला.

त्यामुळे मालमत्ता कर वसुलीला ब्रेक लागला. परिणामी गेल्या काही महिन्यांपासून कर वसुली थंडावली. मात्र, यावर्षी जुन्याच दराने कर वसुली होत असल्याने नागरिकांनी कर भरणा करावा असे आवाहन मनपा प्रशासनाकडून करण्यात आले. त्यानंतरही नागरिकांकडून अपेक्षित प्रतिसाद मिळाला नाही. दरम्यान, राष्ट्रीय लोकअदालतीचे निमित्त साधून मनपा प्रशासनाने ९ ते २८ सप्टेंबरदरम्यान मालमत्ता करावरील शास्तीत शंभर टक्के सूट जाहीर केली. या योजनेचा थोडाफार का होईना महापालिकेला फायदा झाल्याचे दिसते. (latest marathi news)

चार कोटी रुपये वसूल

शनिवारी (ता.२८) राष्ट्रीय लोकअदालतीत एकूण ३२५ थकबाकीदारांनी सहभाग नोंदवत मालमत्ता कर थकबाकी अदा केली. यातून महापालिकेच्या तिजोरीत ८४ लाख ७६ हजार ५४ रुपये जमा झाले. दरम्यान, शास्ती माफी योजनेच्या कालावधीत अर्थात ९ ते २७ सप्टेंबरदरम्यान दोन कोटी ९१ लाख ८२ हजार ३९४ रुपये कर वसुली झाली.

तर पाणीपट्टीपोटी २९ लाख ४२ हजार ७५५ रुपये वसूल झाले. त्यामुळे राष्ट्रीय लोकअदालतीच्या निमित्ताने दिलेल्या शास्ती माफी योजनेच्या एकूण कालावधीत मालमत्ता कर, पाणीपट्टीपोटी एकूण चार कोटी सहा लाख एक हजार २०३ रुपये जमा झाले.