Dhule Fraud Crime : खोट्या व बनावट स्वाक्षऱ्यांतून सेल्फ धनादेशाद्वारे भागीदारी फर्मची तब्बल ६१ लाखांत फसवणूक झाली. या प्रकरणी शहर पोलिस ठाण्यात संशयित लेखापालाविरुद्ध (अकाउंटंट) गुन्हा दाखल झाला. पोलिसांनी त्याला अटक केली. (Firm defrauded of Rs 61 Lakhs)

या प्रकरणी चिरायू अनुप अग्रवाल (वय २२, रा. प्लॉट क्रमांक १८, अग्रवालनगर, धुळे) याच्या फिर्यादीनुसार १ एप्रिल ते ३० सप्टेंबर यादरम्यान वेळोवेळी चिरायू ट्रेडर्स भागीदारी फर्मच्या धुळे विकास सहकारी बँक (गरुडबाग शाखा) येथील चालू खात्यातून भागीदारी फर्मचा अकाउंटंट नीलेश कचरूलाल अग्रवाल (रा. भाईजीनगर, धुळे) याने त्याच्या ताब्यातील बँकेच्या फर्मच्या खात्याच्या धनादेश पुस्तकाचा दुरुपयोग केला.

धनादेशावर त्याने चिरायू अग्रवाल याच्या खोट्या व बनावट स्वाक्षऱ्यांतून सेल्फ चेकद्वारे एकूण ६१ लाख परस्पर काढून घेतले. तसेच ते स्वतःसाठी व त्यांच्या कुटुंबीयांसाठी वापरून फसवणूक केली. भागीदारी फर्मच्या रकमेचा अपहार केला. त्यानुसार संशयित नीलेश अग्रवाल याच्याविरुद्ध शहर पोलिस ठाण्यात विविध कलमान्वये गुन्हा दाखल झाला. पोलिसांनी त्यास अटक केली.