तळोदा : सातपुड्याच्या कुशीत वसलेल्या तळोदा तालुक्यातील कुयलीडाबर गावाला जोडणारा रस्ता पहिल्याच पावसात वाहून गेल्याने ग्रामस्थांच्या अडचणी वाढल्या आहेत. दरम्यान गेल्या वर्षभरापासून महात्मा गांधी राष्ट्रीय ग्रामीण रोजगार हमी योजनेअंतर्गत या रस्त्याचे काम हाती घेण्यात आलेले होते. मात्र पहिल्याच पावसात रस्ता वाहून गेल्याने या परिसरातील नागरिकांना मोठ्या त्रासाला सामोरे जावे लागेल, असे बोलले जात आहे. (Dhule Heavy Rain Damage incident at Cuylidabar)

तळोदा तालुक्यातील कुयलीडाबर हे सातपुड्याच्या पायथ्याशी वसलेले अतिदुर्गम भागातील सुमारे ३०० लोकसंख्या असणारे गाव आहे. स्वातंत्र्याच्या ७५ वर्षानंतरही या गावाला जोडणारा पक्का रस्ता अद्यापपर्यंत नव्हता. त्यामुळे या गावातील नागरिकांना मूलभूत सोयीसुविधांसाठी मोठा संघर्ष करावा लागत होता. गावात जाण्यासाठी तब्बल चार ते पाच किलोमीटर पायपीट करून जावे लागते.

रस्ता नसल्याने या गावातील ग्रामस्थांना अनेक समस्यांना सामोरे जावे लागत होते. गावात रस्ता व्हावा ,अशी ग्रामस्थांची अनेक वर्षांपासून मागणी होती. आमदार राजेश पाडवी यांनी स्वतः याबाबत लक्ष घालून रस्त्यासाठी पाठपुरावा केला होता. महात्मा गांधी राष्ट्रीय ग्रामीण रोजगार हमी योजनेअंतर्गत या रस्त्याचे काम हाती घेतलेले होते. त्याअंतर्गत रस्ता तयार झाला होता. मात्र तयार रस्ता एकाच पावसात वाहून गेला आहे. (latest marathi news)

तत्काळ दुरुस्तीची मागणी

रविवारी (ता.२३) रोजी तळोदा शहरासह तालुक्यात ठिकठिकाणी पावसाने जोरदार हजेरी लावली होती. सातपुड्याच्या पायथ्याशी वसलेल्या कुयलीडाबर (ता. तळोदा) या ठिकाणीही चांगला पाऊस झाला. मात्र या पावसात कुयलीडाबर गावाला जोडणारा रस्ता पहिल्याच पावसात वाहून गेला.

जेमतेम तयार झालेला रस्ताही वाहून गेल्याने ऐन पावसाळ्यात ग्रामस्थांच्या अडचणी वाढल्या आहेत. त्यामुळे आता ग्रामस्थांना रहदारीला त्रास होणार आहे. रस्त्याच्या वरचा थर वाहून गेल्याने आता फक्त लहान मोठे दगड उरले आहेत. त्यामुळे अशा रस्त्यावर वाहन चालविणे ग्रामस्थांना मोठ्या मुश्किलीचे होत आहे. त्यामुळे लवकरात लवकर रस्त्याची दुरुस्ती करावी, अशी मागणी परिसरातील ग्रामस्थांनी केली आहे.