धुळे : शहर व परिसरात विजांचा कडकडाट आणि मेघगर्जनेसह २४ सप्टेंबरला रात्री तसेच २५ सप्टेंबरला दुपारी व सायंकाळी पावसाने हजेरी लावली. गेल्या चार दिवसांपासून पावसाचा जोर आहे. पुढील दोन दिवस हा जोर कायम राहण्याचा अंदाज आहे. तीन दिवस झालेल्या परतीच्या पावसामुळे शहरातील सखल भागात पाणी साचले आहे. (heavy rain for two days)

मध्यरात्रीच्या सुमारास शहरासह नगाव, धमाणे, कापडणे, देवभानेसह (ता. धुळे) परिसराला परतीच्या पावसाने झोडपून काढले. त्यात ढगांचा प्रचंड गडगडाट आणि विजांच्या कडकडाट धडकी भरविणारा होता. सुमारे दीड ते दोन तास झालेल्या या पावसाने नदी, नाल्यांना पूर आला आहे. देवपूर भागातील सुशीनाल्याला पूर आला. जिल्हा क्रीडा संकुल परिसरातील दोन ते तीन फरशी पुलावरून पाणी गेले. त्या दरम्यान वाहतूक बंद ठेवण्यात आली.

कृषी महाविद्यालयाच्या वेधशाळेत २४ सप्टेंबरला ३०.२ मिलीमीटर, तसेच बुधवारी १२.२ मिलीमीटर पावसाची नोंद झाली. जिल्ह्यात आतापर्यंत ५८०.०५ मिलीमीटर पाऊस झाला आहे. गुरुवारी रात्री उशिरापर्यंत पावसाची रिपरिप सुरु राहिल्याने उकाड्यामुळे नागरिक हैराण झाले. त्यातच काही भागात वीजपुरवठा खंडित झाला. अक्कलपाडा धरणाच्या पाणलोट क्षेत्रातही पाऊस झाल्याने धरणातून पांझरा नदीपात्रात पाण्याचा विसर्ग करण्यात आला. बुधवारी पहाटे तीनला तीन गेट उघडण्यात आले. त्यातून तीन हजार क्युसेक पाण्याचा विसर्ग पांझरा नदीपात्रात सोडण्यात आला.