Dhule News : तीन वर्षीय चिमुरडीचा खून करून घराजवळ मृतदेह पुरल्याच्या संशयावरून तिच्या बापाला शहर पोलिसांनी अटक केली. शनिवारी (ता.८) या घटनेस वाचा फुटली. मृतदेह बाहेर काढून उत्तरीय तपासणीसाठी पाठवला असून संशयित बापाला अटक केली आहे. नांदर्डे (ता. शिरपूर) येथे ही घटना घडली. पूजा अनिल पावरा असे मृत बालिकेचे नाव असून तिचे वडील अनिल गुलाब पावरा खुनातील प्रमुख संशयित आहे. ( Little girl was killed and body buried by father )

सहा जूनला रात्री मद्याच्या नशेत त्याने मुलीच्या डोक्यात लाकडी दांडक्याने घाव घालून तिचा खून केला व पहाटे मृतदेह घरामागे मोकळ्या जागेत पुरल्याचा संशय आहे. पोलिस पाटील पंकज पावरा यांनी माहिती देताच प्रभारी निरीक्षक जयपाल हिरे व फॉरेन्सिक पथकाने घटनास्थळी भेट दिली. मृत पूजाचा मृतदेह उकरून काढण्यात आला.

अशी फुटली वाचा

पूजा ही अनिल पावराच्या पहिल्या पत्नीपासून झालेली मुलगी होती. तिची आई पतीला घटस्फोट देऊन निघून गेली आहे. त्यानंतर अनिलने दुसरे लग्न केले. मात्र दुसरी पत्नीही त्याला सोडून गेली. अनिलच्या शेजारी त्याचे नातलग राहतात. त्यांच्या घरी पूजाचे येणे-जाणे होते. दोन दिवसांपासून ती दिसत नसल्यामुळे त्यांनी अनिलकडे चौकशी केली.

त्याने उडवाउडवीची उत्तरे दिल्याने त्यांचा संशय बळावला. त्यांनी पोलिस पाटील पंकज पावरा यांना ही बाब सांगितली. पावरा व अन्य नातलगांनी दरडावून विचारणा केल्यावर अनिलने आपण पूजाचा खून करून मृतदेह पुरल्याची माहिती दिली.