धुळे : शिंदखेडा तालुक्यात ८५ गावे टंचाईग्रस्त आहेत. या टंचाईग्रस्त गावांची पिण्याची पाण्याची समस्या कायमची दूर व्हावी यासाठी मराठवाडा वॉटर ग्रिडच्या धर्तीवर ८५ गाव वॉटर ग्रिड योजना महत्त्वाकांक्षी योजना आहे. या योजनेचे गतीने काम सुरू आहे.

उन्हाळा सुरू झाल्याने संबंधित गावांची पिण्याच्या पाण्याची समस्या दूर व्हावी यासाठी संबंधित अधिकारी, ठेकेदारांनी ही योजना निर्धारित वेळेत पूर्ण करावी, अशा सूचना माजी मंत्री तथा शिंदखेडा मतदारसंघाचे आमदार जयकुमार रावल यांनी दिल्या. (Dhule MLA Jaykumar Rawal work of Water Grid marathi news)

शिंदखेडा तालुक्यातील टंचाईग्रस्त ८५ गावांना शाश्वत पिण्याच्या पाण्याची सोय करणाऱ्या ८५ गाव वॉटर ग्रिड योजनेचे काम प्रगतिपथावर असून, या कामाचा आढावा रविवारी (ता. २५) आमदार रावल यांनी दोंडाईचा पालिकेच्या सभागृहात घेतला.

जिल्हा परिषदेतील भाजपचे गटनेते कामराज निकम, कार्यकारी अभियंता एस. सी. निकम, उपविभागीय अभियंता एस. एन. वानखेडे, भाजपचे तालुकाध्यक्ष दीपक बागल, जिल्हा परिषद सदस्य डी. आर. पाटील, जिल्हा परिषदेचे माजी सदस्य वीरेंद्रसिंह गिरासे, भारतीय जनता युवा मोर्चाचे तालुकाध्यक्ष बंटी बागूल, होळ,

रामी, मेथी, विखरण, पथारे, झिरवे, जोगशेलू, सुराय, दलवाडे, विखुर्ले, खर्दे, मांडळ, वरुड, वाडी, अजंदे, कंचनपूर, वायपूर, आलाने, रामी, मेथी, होळ, साळवे, वरझडी, चिमठाणे, मांडळ आदी विविध गावांतील सरपंच, उपसरपंच व इतर प्रतिनिधी, शाखा अभियंता डी. ओ. पाटील, दीपक कोचर, प्रकल्प व्यवस्थापक विनीत भोजराज, प्रकल्प सल्लागार अमरजित कुमार आदी उपस्थित होते.

बैठकीत आमदार रावल म्हणाले, की शिंदखेडा तालुका हा कायमस्वरूपी दुष्काळी असलेला तालुका. परंतु हा डाग पुसण्याचे काम मी करत आहे. यासाठी अविरत प्रयत्न सुरू आहेत. यातील पिण्याच्या पाण्यासाठी टंचाईग्रस्त असलेल्या गावांना शाश्वत पाणीपुरवठा व्हावा यासाठी तापी नदीवरून मोठ्या पाइपलाइनने पेडकाई मंदिर येथे जलशुद्धीकरण केंद्र बनवून तेथून तालुक्यातील ८५ गावांना पाणीपुरवठा करण्यात येणार आहे. (Latest Marathi News)

या योजनेचे काम मोठ्या गतीने सुरू आहे. मात्र अजून गती देण्याची गरज आहे, जेणेकरून टंचाईग्रस्त गावांना दिलासा मिळेल. त्यामुळे निर्धारित वेळेत हे काम पूर्ण व्हावे, अशा सूचना त्यांनी अधिकारी, ठेकेदारांना दिल्या.

थेट मंत्र्यांना फोन अन्...

या योजनेचे काम सुरू असताना गावागावांत या पाइपलाइनचे काम सुरू आहे. मात्र, त्यासाठी गावांतर्गत काँक्रिटीकरण तोडले जात आहे. त्यामुळे विद्रूपीकरण होत असल्याच्या तक्रारी सरपंच, पदाधिकाऱ्यांनी आमदार रावल यांच्याकडे केल्या. संबंधित रस्ते पूर्ववत करण्यासाठी कोणत्याही निधीची तरतूद योजनेत नाही.

यावर आमदार रावल यांनी पाणीपुरवठामंत्री गुलाबराव पाटील यांना थेट बैठकीतून फोन करत याबाबत मागणी केली. त्यावर मंत्री श्री. पाटील यांनी तत्काळ प्रस्ताव सादर करा, निधी मंजूर करतो, असे आश्वासन आमदार रावल यांना दिले.