Dhule News : तालुक्यातील अर्थे, विखरण परिसरात १ मार्चला तुफानासह पावसामुळे झालेल्या शेतीच्या हानीची पाहणी आमदार काशीराम पावरा यांनी केली. प्रशासनाला पंचनामे करण्याचे आदेश त्यांनी दिले. नुकसानग्रस्त शेतकऱ्यांशी चर्चा करताना त्यांनी शासनस्तरावरून मदत मिळवून देण्याबाबत आश्वासन दिले.

अर्थे, विखरण, कुवे, वाडी, वाघाडी परिसरात १ मार्चला दुपारी मोठे वादळ आणि पाऊस झाला. त्यात केळी व पपईच्या बागा उद्‍ध्वस्त झाल्या. (Dhule MLA Kashiram Pawar inspected damage to agriculture caused by storm and rain)

कापलेला शेतमाल, शेतातील मका, गहू, बाजरी, हरभरा यांना मोठा फटका बसला. शेतीत मोठी गुंतवणूक केली असतानाच अस्मानी आपत्ती कोसळल्याने शेतकऱ्यांचे मोठे नुकसान झाले. दरम्यान, शनिवारी (ता. २) सकाळपासून आमदार काशीराम पावरा यांनी बाधित क्षेत्रांना भेट देऊन शेतकऱ्यांचे सांत्वन केले.

त्यांच्यासोबत धुळे जिल्हा परिषदेचे माजी अध्यक्ष डॉ. तुषार रंधे, पंचायत समितीचे माजी उपसभापती दीपक गुजर, डॉ. शशिकांत पाटील, मनोहर पाटील, प्रल्हाद पाटील, बाळू चव्हाण, अनिल चव्हाण, दत्तात्रय चव्हाण, प्रवीण पाटील, श्याम पाटील, कंवरदास पाटील, संजय पाटील, मगन धनगर, मनोहर पाटील दौऱ्यात सहभागी झाले. (latest marathi news)

मदतीचे आश्वासन

शेतकऱ्यांनी झालेल्या हानीबाबत आमदार पावरा यांना माहिती दिली. शासनाकडून तातडीची व भरीव स्वरूपात मदत मिळावी, अशी अपेक्षा त्यांनी व्यक्त केली.

आमदार पावरा यांनी प्रशासनाशी संपर्क साधून तातडीने पंचनामे करून नुकसानभरपाईचे प्रस्ताव देण्याचे आदेश दिले. शेतकऱ्यांचे सांत्वन करताना त्यांनी शासनाकडून मदत मिळवून देण्याचे आश्वासन दिले.