निजामपूर-जैताणे (साक्री-धुळे) : माळमाथा परिसरातील निजामपूर (ता. साक्री) येथे सुमारे 47/48 वर्षानंतर प्रथमच रविवारी (ता. 10) फिरत्या नारळाचा कार्यक्रम होत असून, 8 डिसेंबरपासून सलग तीन दिवस कार्यक्रमांची रेलचेल आहे. ह.भ.प. प्रमोद महाराज जगताप बारामतीकर यांचे जाहीर कीर्तन हे आकर्षणाचे केंद्रबिंदू असून 'भक्त पुंडलिक' हे नाटक, प्रवचन, हरिपाठ, गीतापाठ, माऊलींच्या पादुकांची रथ मिरवणूक, निवृत्तीनाथ महाराज पदयात्रा, महाप्रसाद आदींचा त्यात समावेश आहे. वारकरी संप्रदायाचे श्रद्धास्थान परमपूज्य जोग महाराज, मामासाहेब दांडेकर, हभप. कृष्णाजी गुरुजी यांच्या आशीर्वादाने प्रेरित अशा या कार्यक्रमास हभप. यशोदा अक्का यांची प्रमुख उपस्थिती आहे.

शुक्रवारी (ता. 8) रात्री मुंबई येथील वीरभद्र कलापथकाने 'भक्त पुंडलिक' हे नाटक सादर केले. शनिवारी (ता. 9) रोजी रात्री नऊ ते अकरादरम्यान ह.भ.प. मच्छिंद्र महाराज (वाडीभोकर) यांचे जाहीर कीर्तन होईल. 10 तारखेला दुपारी दोन ते चार माऊलींच्या पादुकांची रथ मिरवणूक, दुपारी दोनपासून अविरत महाप्रसाद, दुपारी साडेतीन ते साडेचार हभप. विश्वनाथ महाराज (तळवाडे) यांचे प्रवचन, सायंकाळी पाच ते सहा हरिपाठ व गीतापाठ, सायंकाळी सात ते आठ संगीत भजन, रात्री आठ ते साडेआठ निवृत्तीनाथ महाराज पदयात्रा नियोजन, रात्री साडेआठ ते अकरा ह.भ.प. प्रमोद महाराज जगताप (बारामती) यांचे जाहीर कीर्तन होईल. "या फिरत्या नारळाच्या कार्यक्रमासाठी अन्नपूर्णा समिती, पार्किंग समिती, पाणी व्यवस्थापन समिती, निधी संकलन समिती, सल्लागार समिती अशा एकूण पाच समित्या गठीत करण्यात आल्या असून खान्देशासह राज्यातील सुमारे पन्नास हजार भाविक या फिरत्या नारळाच्या कार्यक्रमाला हजेरी लावतील," अशी प्रतिक्रिया ग्रामस्थ, भजनी मंडळ व संयोजकांतर्फे सामाजिक कार्यकर्ते राजेंद्र वाणी यांनी 'सकाळ'शी बोलताना दिली. समस्त ग्रामस्थ व भजनी मंडळाने उपस्थितीचे आवाहन केले आहे.