Dhule News : येथील सुमारे अडीचशे वर्षांची परंपरा असलेल्या ग्रामदैवत श्री खंडेराव महाराजांच्या यात्रेस माघ शुद्ध पौर्णिमेच्या मुहूर्तावर शनिवार (ता. २४) पासून सुरवात होणार आहे. महाशिवरात्रीपर्यंत चालणाऱ्या यात्रेसाठी संयोजक श्री खंडेराव बाबा विकास संस्था व पालिकेने तयारी पूर्ण केली आहे.

सकाळी नऊला श्री खंडेराव महाराजांची महाआरती आमदार काशीराम पावरा, माजी नगराध्यक्ष भूपेशभाई पटेल व भारतीय जनता पक्षाचे जिल्हाध्यक्ष बबनराव चौधरी यांच्या हस्ते करण्यात येणार आहे.(Yatrotsav of Khanderao Maharaj from today in Shirpur)

मानकरी, संस्थानच्या सेवकांसह यात्रोत्सवासाठी सहकार्य करणाऱ्यांचा सत्कार संस्थानतर्फे केला जाणार आहे. त्यानंतर यात्रेला औपचारिक सुरवात होणार आहे. मसाले, धातूंची भांडी व अन्य उपकरणे यासाठी शिरपूरची यात्रा प्रसिद्ध आहे. यात्रेच्या दोन दिवसांपूर्वीच संबंधित विक्रेते डेरेदाखल झाले आहेत.

आबालवृद्धांचे आकर्षण असलेले आकाशपाळणे, मेरी गो राउंड, डिस्को पाळणा, सलाम्बो, स्काय ट्रेन, मौत का कुआँ आदींचीही उभारणी करण्यात आली. पन्नालाल गधा, डॉग शो, जादूचे प्रयोग हे बालगोपाळांत लोकप्रिय मनोरंजनाचे खेळही यंदा पाहायला मिळणार आहेत.

त्यासोबतच मिठाई, पावभाजी, चायनीज खाद्य पदार्थांचे लहान-मोठे स्टॉल्सही सज्ज आहेत. यात्रेचे प्रमुख आकर्षण असलेली व लाडकी या नावाने प्रसिद्ध गुळाची जिलबी, गोडीशेव, चिवडा, पापडी, शेव विक्री करणारी हलवायांची दुकानेही थाटण्यात आली आहेत.

अश्वबाजार सजला

सारंगखेडा येथील यात्रेपाठोपाठ शिरपूरचा पशूबाजार प्रसिद्ध असून, जातिवंत अश्वांच्या विक्रीतून दर वर्षी कोट्यवधी रुपयांची उलाढाल होत असते. येथील बाजार समितीच्या आवारात पशूबाजार भरविला जात असू,न उत्तम जातीचे बैल, गायी, म्हशी, रेडेही येथे विकले जातात.

पंजाब, उत्तर प्रदेश, राजस्थानमधून अश्व घेऊन आठवडाभरापूर्वीच व्यापारी दाखल झाले आहेत. पालिका व संस्थानतर्फे व्यावसायिकांना जागा, पाणी आणि विजेची सुविधा उपलब्धता करून देण्यात आली आहे.