धुळे : शहरातील देवपूर भागातील प्रभातनगरमध्ये चोरट्यांनी धाडसी चोरी केल्याचे गुरुवारी (ता. २) सकाळी उघडकीस आले. चोरट्यांनी घरातून ३६ हजारांची रोकड व २० तोळे सोन्याचे दागिने लंपास केले. घटनेची माहिती मिळताच देवपूर पोलिस ठाण्याचे अधिकारी, कर्मचाऱ्यांनी घटनास्थळी पाहणी केली.

प्रभातनगरमधील प्लॉट क्रमांक दहामध्ये गोरख महादू शिंपी यांचे वास्तव्य आहे. ते येथील एमआयडीसीत कामाला आहेत. त्यांच्या पत्नी खानावळ चालवितात. बुधवारी (ता. १) उकाड्यामुळे शिंपी कुटुंबीय घराच्या छतावर झोपले होते. सकाळी सहाला श्री. शिंपी खाली आले. दरवाजा उघडून ते बाहेर गेले. हीच संधी साधत चोरट्याने घरात शिरून कपाटातून ३६ हजारांची रोकड व मुलीच्या लग्नाचे सोन्याचे टॉप्स, दोन अंगठ्या, मंगळसूत्र आणि साखळ्या, असे तब्बल २० तोळ्यांचे दागिने चोरून नेले. घरात चोरी झाल्याचे लक्षात येताच शिंपी यांनी देवपूर पोलिसांना कळविले. माहिती मिळताच देवपूर पोलिस ठाण्याचे पोलिस निरीक्षक मोतीलाल निकम यांनी पथकासह भेट देत पाहणी केली. या घटनेने मात्र शिंपी कुटुंबीयांवर संकट कोसळले. शिवाय परिसरातही चोरीच्या या घटनेने दहशत निर्माण झाली. याप्रकरणी देवपूर पोलिस ठाण्यात गुन्हा दाखल झाला.