जळगाव ः जळगाव शहरातील सर्वच रस्त्यांची अवस्था अतिशय वाईट आहे. त्यामुळे शहरातील नागरिक कमालीचे त्रस्त झाले असून आता चांगलेच संतापले आहे. त्यात महापालिकेतील सत्ताधारी भाजपच्या नगरसेवकांना देखील रस्ते दुरुस्तीसाठी नागरिकांसोबत रस्त्यावर उतरावे लागत असल्याची शोकांतिका जळगाव शहरात पाहण्यास मिळत आहे. त्यात आज रामानंद नगर परिसरातील संतप्त नागरिकांनी रामानंद नगरचा रस्ता अडवून रस्ता आंदोलन केले. यावेळी पाच वर्षात काय केले..., काम जमत नसेल तर राजीनामा द्या.. अशा तिव्र संतप्त भावना व्यक्त केल्या. 

गेल्या दोन वर्षापासून जळगाव शहरातील 650 किलोमीटर लांबीचे सर्वच रस्ते हे आज खड्डेमय झालेले आहे. त्यामुळे जळगाव शहरातील सुमारे साडेपाच लाख नागरिकांचे या खराब रस्त्यांनी हाडे खिळखिळे केले आहे. त्यामुळे आता नागरिकांमध्ये आमदार सुरेश भोळे तसेच महापालिकेतील सत्ताधारी भाजपच्या विरोधात तिव्र असंतोष निर्माण झाला असून आज तो रामानंद नगरच्या रस्त्यावर पाहण्यास मिळाला. सत्ताधारी भाजपच्या नगरसेविका उज्वला बेंडाळे, भारती राणे यांच्यासह नागरिकांनी रामानंद नगर रस्त्यावरील रास्ता रोको आंदोलन आज सकाळी साडेअकरा वाजता केले. रास्ता रोको आंदोलन सुरू केल्याने आमदार सुरेश भोळे तसेच नगरसेवक कैलास सोनवणे आंदोलनास्थळी येवून नागरिकांची समजूत काढत होते. तसेच सात दिवसात रस्ता दुरुस्तीचे आश्‍वासन यावेळी नागरिकांना दिले. 

मक्तेदारावर कारवाई करा 
अमृत योजने अंतर्गत जलवाहिनीसाठी काव्यरत्नावली ते गिरणाटाकी पर्यंतचा खोदलेले रस्ता मक्तेदाराने गेल्या वर्षभरापासून व्यवस्थित न बुजविलेला नाही. पावसाळ्यात या रस्त्यावरून पायी चालणे देखील मुश्‍कील होते. पावसाळा गेला तरी मक्तेदार खोदलेला रस्ता चांगला करत नसून त्याच्यावर आधी कारवाई करा अशा तिव्र शब्दात मागणी आमदार व प्रशासनाच्या अधिकाऱ्यांकडे केली. 

हेपण पहा :धक्कादायक.. रस्त्यांचे खोदकाम अन्‌ मनपा प्रशासनच अनभिज्ञ

जिल्हाधिकारी निवासस्थानापर्यंतच का रस्त्याचे काम 
काव्यरत्नावली चौक ते गिरणाटाकी रस्त्यावर काव्यरत्नावली चौकाच्या काही अंतरावर जिल्हाधिकाऱ्यांचे निवासस्थान आहे. परंतू तेवढ्याच रस्त्याचे काम केले जात असा प्रश्‍न यावेळी नागरिकांनी आमदार, नगरसेवक तसेच अधिकाऱ्यांना उपस्थित केला. बाकीचे लोक माणूस नाही का असा तिव्र शब्दात नागरिकांनी कानउघाडणी यावेळी केली.