Dhule News : शहरातील साक्री रोड परिसरातील मोगलाई क्षेत्रात भोईवाडा येथे अवैध जुगारअड्ड्याची पक्की रूम व इतर अवैध व्यवसायासाठी उभारलेली पत्र्याची शेड महापालिकेच्या अतिक्रमण निर्मूलन पथकाने बुधवारी पोलिस बंदोबस्तात निष्कासित केली. मोगलाईतील संतप्त घटनेनंतर कारवाईचे शहाणपण यंत्रणेला सुचले. (Jugar Adda Patra shed razed by JCB dhule news)

मोगलाई भागातील भोईवाडा येथे एका मंदिरात विटंबना झाल्याचा प्रकार बुधवारी पहाटे समोर आला.

यानंतर या भागात रात्री नशेखोरांचा वावर, मद्यपींचा वावर तसेच काही ठिकाणी अवैध व्यवसाय चालत असल्याची माहिती समोर आल्यानंतर पोलिस अधीक्षक संजय बारकुंड यांनी जुगारअड्डा व अवैध व्यवसाय चालत असलेली बेकायदा शेड निष्कासित करण्याची सूचना दिली.

हेही वाचा : Credit Card फसवणूक....काय घ्याल काळजी?

त्यानुसार महापालिकेच्या अतिक्रमण निर्मूलन पथकाने पोलिस बंदोबस्तात जुगारअड्ड्याच्या पक्क्या रूम तसेच पत्र्याची शेड जेसीबीच्या सहाय्याने जमीनदोस्त केली. मंदिराच्या जवळच हे अतिक्रमण होते. महापालिका अतिक्रमण निर्मूलन विभागप्रमुख प्रसाद जाधव आणि अपर पोलिस अधीक्षक किशोर काळे, पोलिस अधिकारी योगेश राजगुरू यांच्या उपस्थितीत ही कारवाई करण्यात आली.