जळगाव : आगामी विधानसभा निवडणुकीच्या तोंडावर राष्ट्रवादी काँग्रेस पक्षाचे नेते सोडून जात आहेत. त्यानुसार राष्ट्रावादी काँग्रेस पक्षाने आगामी विधानसभा निवडणुकीत तरुण चेहऱ्यांना अधिकाधिक संधी देण्याचं केलं आहे. अशाच एका तरुण चेहऱ्याला जळगाव ग्रामीणमधून संधी देण्याच्या तयारीत राष्ट्रवादी काँग्रेस पक्ष आहे. कल्पिता पाटील यांनी या मतदारसंघातून उमेदवारीची मागणी केली आहे. त्याला राष्ट्रवादीचे नेते शरद पवार यांनी संमती दिली असल्याचेही बोलले जात आहे.

कल्पिता पाटील राष्ट्रवादीच्या महिला आघाडीच्या जिल्हाध्यक्ष आहेत तसेच त्या महाराष्ट्रातील सर्वात तरुण सरपंच आहेत. त्यांनी शरद पवार यांची भेट घेऊन उमेदवारीची मागणी केली, शरद पवारांनीही त्यांना आशीर्वाद दिला आहे. तशा आशयाची फेसबुक पोस्टही त्यांनी केली आहे.

जळगाव ग्रामीणमधून सध्या शिवसेनेचे गुलाबराव पाटील आमदार आहे. त्यांच्याविरोधात राष्ट्रवादीच्या गुलाबराव देवकरांचं आव्हान होतं, मात्र घरकुल घोटाळ्यात दोषी ठरल्यामुळे त्यांचं नाव मागे पडण्याची शक्यता आहे. देवकरांचं नाव मागं पडण्याच्या शक्यतेनं राष्ट्रवादीत इच्छुकांची गर्दी झाली आहे. त्यात आता कल्पिता पाटील यांनी उमेदवारीसंदर्भात शरद पवार यांनी भेट घेतली. पक्षाकडून त्यांना काम सुरु करण्यास सांगण्यात आल्याचं कळत आहे.