धुळे : अंबोडे (ता. धुळे) येथील खुनाचा तालुका पोलिसांनी चोवीस तासांत छडा लावला. अनैतिक संबंधाच्या संशयावरून पुतण्यानेच काकाचा खून केल्याचे समोर आले आहे. संशयिताला पोलिसांनी ताब्यात घेतले आहे.

२ जूनला अंबोडे (ता. धुळे) शिवारात अनोळखी पुरुषाचा मृतदेह जळालेल्या अवस्थेत मिळून आला होता. दगडू जगताप (रा. अंबोडे ता. धुळे) यांनी आपल्या शेत बांधावरील गवत जाळले. त्या वेळी गवतामध्ये फेकलेला मानवी मृतदेह आढळून आला. आगीमुळे मृतदेहावरील कपडे काहीअंशी जळाले होते. शेतकऱ्याने धुळे तालुका पोलिसांना या घटनेची माहिती दिल्यानंतर तपासात ज्ञानेश्‍वर रामभाऊ राठोड (वय २५, रा. रणाईचे तांडा, ता. अमळनेर) असे मृत व्यक्तीचे नाव असल्याचे निष्पन्न झाले होते. त्याच्या पोटावर, पाठीवर, तोंडावर तीक्ष्ण हत्याराचे वार करण्यात आले होते. या घटनेचा तपास पोलिस निरीक्षक दत्तात्रय शिंदे यांच्या मार्गदर्शनाखाली सुरू झाल्यानंतर पथकाने मृत ज्ञानेश्‍वर राठोड यांचा पुतण्या जगदीश बबलू राठोड (रा. रणाईचे तांडा ता. अमळनेर) याला ताब्यात घेतले. चौकशीत त्याने गुन्ह्याची कबुली दिली. अनैतिक संबंधाच्या कारणावरून त्याने काका ज्ञानेश्‍वर राठोड यांना रणाईचे तांडा येथून दुचाकीवर अंबोडे शिवारात निर्जनस्थळी आणले. तेथे त्यांच्यावर चाकूने वार करून खून केल्याचे तपासात निष्पन्न झाले.

पोलिस अधीक्षक प्रवीणकुमार पाटील, अपर पोलिस अधीक्षक प्रशांत बच्छाव, उपविभागीय पोलिस अधिकारी प्रदीप मैराळे, स्थानिक गुन्हे शाखेचे पोलिस निरीक्षक हेमंत पाटील, पोलिस निरीक्षक दत्तात्रय शिंदे यांच्या मार्गदर्शनाखाली धुळे तालुका पोलिस ठाण्याचे अनिल महाजन, सागर काळे, सुनील विंचूरकर, प्रवीण पाटील, सोमनाथ कांबळे, योगेश पाटील, प्रमोद पाटील, धीरज सांगळे, कुणाल शिंगाणे, नितीन दिवसे, कांतीलाल शिरसाट, राकेश मोरे, योगेश पाटील, विशाल गुरव यांनी या घटनेची उकल करत संशयिताला ताब्यात घेतले.