नाशिक - मित्र देश भूतानच्या लष्करी अधिकाऱ्यांना भारतीय लष्कराकडून नियमित प्रशिक्षण दिले जाते. पण स्वतःचे हवाई दल नसलेल्या भूतानचा एव्हिएटर ‘कॉम्बट आर्मी एव्हिएशन’ने (कॅट) शनिवारी घडविला. त्यामुळे भूतानच्या हवाई सज्जतेच्या इतिहासच येथे रचला गेला. 

भारतीय लष्करासह इतर देशांतील लष्करी अधिकाऱ्यांना सामरिक तंत्रज्ञानाचे धडे देणाऱ्या गांधीनगर येथील ‘कॅट’मध्ये अनोखा इतिहास रचला गेला. भूतानला स्वतःचे नौदल किंवा हवाई दल नाही. तेथील सुरक्षेची जबाबदारी भारतीय लष्कराकडून पेलली जाते. त्यांच्या अधिकाऱ्यांना भारतीय लष्कर प्रशिक्षण देते. मित्रदेशाच्या अधिकाऱ्यांना प्रशिक्षण देताना काही देशांच्या अधिकाऱ्यांना ‘कॅट’मध्ये प्रशिक्षण दिले जाते. त्याअंतर्गत शनिवारी भूतानचे एक अधिकारी प्रशिक्षण पूर्ण करणारे एव्हिएटर ठरले. क्‍युन्गा थिनले असे या लष्करी अधिकाऱ्याचे नाव आहे. ‘कॅट’मध्ये आज २९ व्या तुकडीतील जवानांना ‘विंग’ प्रदान करण्यात आले, तर तिसाव्या तुकडीतील एव्हिएटरचा सन्मान झाला. त्यात क्‍युन्गा थिनले यांनी ‘कॅट’चा प्रशिक्षण अभ्यासक्रम पूर्ण केल्याबद्दल त्यांचा सत्कार करण्यात आला.