भोकर (ता. जळगाव) - येथून जवळच असलेल्या पळसोद, रामेश्‍वर शिवारात मध्यरात्री बिबट्याने गायीवर हल्ला करून ठार केल्याने नागरिकांमध्ये भीती निर्माण झाली आहे. वन अधिकाऱ्यांनीही भेट देऊन परिसरात बिबट्या असल्याचा दुजोरा दिला आहे.

पळसोद-रामेश्‍वर रस्त्यावरील गट क्रमांक १५७ हिरामण मंगल सोनवणे यांच्या शेतातील गोठ्यात बांधलेल्या गायीचा मध्यरात्री एक ते दीडच्या दरम्यान बिबट्याने फडशा पाडला. सालगडी म्हणून कामाला असलेला धोंडू नाईक हा शेतात वास्तव्यास होता. सकाळी त्याला गोठ्यात गाय ही मृतावस्थेत आढळून आली. नाईक याने मालक हिरामण मंगल सोनवणे यांना गाय ही मृत असल्याची माहिती दिली. हिरामण सोनवणे यांच्याशी संपर्क साधला असता, त्यांनी वाघ असल्याची माहिती ‘सकाळ’शी बोलताना दिली व मृत झालेल्या गायीची नुकसान भरपाई देण्याची मागणी केली. वनविभागाच्या अधिकाऱ्यांनी या ठिकाणी भेट देऊन पंचनामा केला. वनविभागाचे बीट वनरक्षक अश्विनी ठाकरे यांच्याशी दूरध्वनीवर संपर्क साधला असता त्यांनी बिबट्या असल्याचे सांगितले. परिसरात नागरिकांमध्ये भीतीचे वातावरण पसरले आहे. पळसोद व रामेश्वर परिसर हा तापी गिरणा नदीच्या संगमावर आहे. याठिकाणी उंच-सखल भाग व घनदाट झाडेझुडपी आहेत. तर जामोद, पळसोद, आमोदा, देवगाव, भोकर, गाढोदा, येथे केळी, ऊसाची लागवड अधिक असल्याने बिबट्याचा वावर आहे. वनविभागाने या बिबट्याचा त्वरित बंदोबस्त करावा, अशी मागणी करण्यात आली आहे.