पिंपळगाव बसवंत - दिंडोरी मतदारसंघाच्या भाजपच्या उमेदवारीचा तिढा अद्याप सुटलेला नाही. खासदार हरिश्‍चंद्र चव्हाण यांना उमेदवारीसाठी प्रयत्नांची शिकस्त करावी लागत आहे. यासाठी चव्हाण यांची स्वारी शिष्टमंडळासह पालकमंत्री गिरीश महाजन यांच्या दारी सोमवारी गेल्याचे समजते. महाजन यांनी त्यांना फारसा सकारात्मक प्रतिसाद दिला नसल्याने भाजपचा उमेदवार चव्हाण की डॉ. भारती पवार, हे गूढ कायम आहे.

राष्ट्रवादी कॉंग्रेसच्या प्रदेश उपाध्यक्षा डॉ. भारती पवार यांना पक्षाने उमेदवारी डावलल्याने त्या भाजपचे दार ठोठावत आहेत. युतीच्या मेळाव्यात त्यांचा प्रवेश ऐनवेळी स्थगित करण्यात आला. त्यामुळे खासदार चव्हाण यांना उमेदवारीसाठी बळकटी मिळाली होती. ज्येष्ठ नेते नितीन गडकरींमार्फत प्रयत्न केले. भाजपने अजून नकराघंटा वाजविलेली नसल्याने डॉ. पवार यांचे उमेदवारीसाठी शर्थीचे प्रयत्न सुरू आहेत. पालकमंत्री गिरीश महाजन यांनी डॉ. पवार यांना हिरवा कंदील दिल्याचे वृत्त आहे. त्यामुळे उमेदवारीची शर्यत अद्याप संपलेली नाही.