धुळे : जिल्ह्यातील कोरोना प्रतिबंधक लसीकरण केंद्रांवर गर्दी वाढत आहे. आपल्यापासून अन्य कुणाला कोरोना विषाणूचा संसर्ग होणार नाही याची खबरदारी लसीकरणासाठी (vaccination) येणाऱ्या प्रत्येक नागरिकाने बाळगतानाच कोरोना (coronavirus) विषाणूच्या चाचणीच्या निगेटिव्ह अहवालाची प्रत शक्यतोवर सोबत बाळगावी, असे आवाहन जिल्हादंडाधिकारी तथा जिल्हाधिकारी संजय यादव यांनी केले. (dhule news coronavirus vacination center nigative report)

जिल्हाधिकारी यादव यांनी म्हटले आहे, की जिल्ह्यातील प्रत्येक पात्र व्यक्तीचे लसीकरण करण्यात येईल. तसे निर्देश स्थानिक स्वराज्य संस्थेचा आरोग्य विभाग आणि जिल्हा शल्यचिकित्सकांना दिले आहेत. सुरवातीला फ्रंटलाइन वर्कर व ४५ वर्षांवरील नागरिकांचे लसीकरण करण्यात येत होते. आता १८ ते ४४ वर्षे वयोगटातील नागरिकांच्या लसीकरणालाही सुरवात झाली आहे. त्यामुळे लसीकरण केंद्रांवर मोठ्या प्रमाणात गर्दी होत आहे. ही स्थिती कोरोना विषाणूचा प्रादुर्भाव वाढीसाठी धोकादायक ठरू शकते. या स्थितीत कोरोना विषाणूचा प्रादुर्भाव वाढू नये म्हणून प्रत्येक नागरिकाने खबरदारी बाळगणे आवश्यक आहे.

तर लसीकरण केंद्रावर करावी चाचणी

लसीकरणासाठी येणाऱ्या नागरिकांनी कोरोना चाचणीच्या निगेटिव्ह अहवालाची प्रत शक्यतो जवळ बाळगावी. असा अहवाल ज्या नागरिकांजवळ नसेल, तसेच ज्या नागरिकांमध्ये कोरोना विषाणूची प्रारंभिक लक्षणे दिसून येतील, त्यांची लसीकरण केंद्रांवरच चाचणी करावी. त्यानुसार आरोग्य यंत्रणांनी लसीकरण केंद्रांवर सुविधा उपलब्ध करून द्यावी, अशाही सूचना जिल्हाधिकारी यादव यांनी दिली आहे. लसीकरण केंद्रांवरील आरोग्य कर्मचाऱ्यांना सहकार्य करावे. मास्कचा वापर करावा, शारीरिक अंतर पाळावे, असेही आवाहन आहे.