पिंपळनेर (धुळे) : येथून जवळच असलेल्या वाकी (ता. साक्री) येथे गॅस गळतीमुळे घराला आग लागल्याची घटना बुधवारी घडली. यात चार कुटुंबाच्या संसाराची राखरांगोळी झाली. आगीत रोख रकमेसह सुमारे 16 ते 17 लाखांचे नुकसान झाल्याचा प्राथमिक अंदाज आहे.
वाकी (ता. साक्री) येथे साहीसिंग मांग्या भारुडे, भुया रायसिंग भारुडे, दानील रेश्मा भारुडे यांचे कुटुंब एकत्र राहते. घरातील सदस्य संख्या 17 एवढी आहे. भारूडे यांच्या घराला बुधवारी दुपारी गॅस गळतीमुळे आग लागली. आगीत चारही कुटुबाचे संसारपयोगी साहित्य, कपडे, धान्य जळून खाक झाले. घरात आणखी दोन सिलिंडर असल्याने स्फोट होईल या भीतीने कोणीही आग विझविण्यासाठी सुरवातीला पुढे येत नव्हते. 

ग्रामस्‍थांनीच घेतला पुढाकार
सामाजिक कार्यकर्ते प्रवीण चौरे यांनी अग्निशमनदलाला फोन केला. मात्र ते आले नाही. अखेर ग्रामस्थांनीच पुढाकार घेतला. जवळच सुरू असेलल्या बांधकामाच्या ठिकाणावरून ग्रामस्थांनी टँकरने पाणी आणून आग विझविण्याचा प्रयत्न केला. दरम्यान घटना घडली तेव्हा घरातील सदस्य शेतात गेले होते. त्यामुळे सुदैवाने प्राणहानी टळली. 

सात लाखापर्यंत नुकसान
घटनेची माहिती मिळताच ग्रामपंचायतचे अधिकारी दाखल झाले. त्यांनी आगीचा पंचनामा केलेला आहे. या आगीत सुमारे 16 ते 17 लाखांचे नुकसान झाल्याचा अंदाज वर्तविण्यात येत आहे. आगीमुळे हे कुटुंब रस्त्यावर आले असून त्यांच्यावर फक्त अंगावरचे कपडे राहिले आहेत. तरी महसूल विभागाने तत्काळ लक्ष देऊन त्यांना नुकसानभरपाई द्यावी, अशी मागणी सरपंच जालमसिंग देसाई व सामाजिक कार्यकर्ते प्रवीण चौरे यांनी शासनाकडे केलेली आहे. दरम्यान वाकी येथे घराला लागलेल्या आगीबाबत पिंपळनेर पोलीस स्टेशनला रात्री उशिरापर्यंत नोंद झालेली नव्हती.

ट्रॅक्टरसाठी ठेवलेले पैसे जळून खाक
दानील रेश्मा भारुडे याला नवे ट्रॅक्टर घ्यायचे होते. याकरीता घरात दोन लाख रुपये शिल्लक ठेवले होते. पण या आगीमध्ये संपूर्ण पैसे जळून खाक झाल्याचे भारुडे यांनी सांगितले. 

संपादन ः राजेश सोनवणे