जळगाव ः अन्न व औषध प्रशासन, जळगाव कार्यालयामार्फत दिवाळी सणानिमित्त विशेष मोहीम राबविण्यात येत आहे. खाद्यतेल, रिपॅकर, घाऊक विक्रेते यांचेकडुन शहरात तसेच जिल्ह्यात विविध ठिकाणी 13 नमुने घेतले आहे. 3 खाद्य तेल आस्थपनांकडील सुमारे 2500 किलोग्रॅम इतका शेंगदाणा तेल, आर. बी. डी पामोलिन तेलाचा साठा भेसळीच्या संशयावरून जप्त करण्यात आला आहे. 

खाद्यतेलाच्या भेसळी प्रकरणी घेण्यात आलेले नमुने अन्न विश्‍लेषकांकडे विश्‍लेषणाकरिता पाठविण्यात आले असून विश्‍लेषण अहवाल प्राप्त होताच पुढील योग्य ती कारवाई करण्यात येईल. अशी माहिती अन्न व औषध प्रशासनाचे सहायक आयुक्त यो. कों. बेंडकुळे यांनी दिली. 

सणासुदीच्या दिवसांमध्ये मिठाई व दुग्धजन्य पदार्थांची मागणी वाढल्याने त्या पदार्थांमध्ये भेसळीची दाट शक्‍यता असते. त्यासंदर्भात देखील अन्न व औषध प्रशासनामार्फत अंकुश ठेवण्यात आला असून शहरातील विविध आस्थापनामधून मिठाई तसेच दुग्धजन्य पदार्थाचे नमुने विश्‍लेषणासाठी घेण्यात आलेले आहे. त्या अनुषंगाने मिठाई उत्पादक, विक्रेते, खाद्यतेल विक्रेते व इतर किरकोळ विक्रेत्यांवर 64 ठिकाणी तपासण्या करण्यात आल्या असून खाद्यतेल, तूप, मिठाई, बेसन या अन्न पदार्थांचे भेसळीच्या संशयावरून 52 नमुने घेण्यात आलेले आहे. 

ग्राहकांनी घ्यावी काळजी 
प्रशासनामार्फत जनतेस आवाहन करण्यात येते की, शिळी, स्वस्त दरातील, रंगीत, हलक्‍या दर्जाची मिठाई तसेच इतर अन्नपदार्थ पारखून घ्यावेत. तसेच मावा, खवा, मिठाई घेताना विशेष काळजी घ्यावी, मिठाईचे सेवन आठ तासाच्या आत करावे. पॅकबंद पदार्थांची खरेदी करताना त्याचा समूह क्रमांक व उत्पादन तिथी तपासून खरेदी करावेत. कुठलाही अन्न पदार्थ खरेदी करताना विक्रेत्याकडून खरेदी बिल घ्यावे.