अमळनेर : तालुक्यात कोरोनाचा वाढता प्रादुर्भाव रोखण्यासाठी प्रताप महाविद्यालयाच्या लेडीज हॉस्टेल मध्ये कोरोना कोविड केअर सेंटरची स्थापना करण्यात आली आहे. आवश्यक सुविधांसह 200 बेडचे नियोजन करण्यात आले आहे. या सेंटरमध्ये सौम्यस्वरुपाच्या आजारांचे रुग्ण दाखल करण्यात येणार असून त्यांचे स्वॅबही याचठिकाणी घेतले जाणार आहे. यामुळे रुग्णाला जिल्ह्याच्या ठिकाणी जाण्याची गरज भासणार नसल्याने समाधान व्यक्त होत आहे.
तालुक्यात कोरोना विषाणूमुळे आपत्कालीन परिस्थिती उद्भवली आहे. आता पर्यत तालुक्यात 18 कोरोना बाधित रुग्ण असून 5 जणांचा मृत्यू झाला आहे.  याच पार्श्वभूमीवर जिल्ह्यात पाहिले कोविड सेंटरच स्थापन करण्यात आले आहे. याठिकाणी आवश्यक वैद्यकीय उपकरणे, औषधी साठा उपलब्ध आहे. तालुकास्तरावर करोना कोविड केअर सेंटरमार्फत रुग्णांचा चांगले उपचार व व्यवस्था उपलब्ध व्हावी, यासाठी व्यवस्थापन समिती नेमण्यात आलेली आहे. याठिकाणी पालिकेतर्फे पाण्याची सोय व साफसफाईची सोय करण्यात येणार असुन रुग्णांना जेवण्याची सोय करण्यात येत आहे. सद्यस्थितीत 38 जणांना  विलगीकरण करण्यात आले आहे. दरम्यान प्रताप महाविद्यालयातील वस्तीगृहातील कोविड केअर सेंटरची पहाणी प्रांताधिकारी सीमा अहिरे,  तहसीलदार मिलिंदकुमार वाघ, वैद्यकीय अधिकारी डॉ प्रकाश ताळे, उपमुख्यअधिकारी संदीप गायकवाड यांनी केली.

केअर सेंटरमध्ये कार्यरत कर्मचारी
सद्यस्थितीत ग्रामीण रुग्णालयाचे वैद्यकीय अधिकारी डॉ प्रकाश ताळे व डॉ संदीप जोशी यांच्या मार्गदर्शनाखाली 'आरबीएसके'चे डॉ गणेश पाटील, डॉ तनुश्री फडके, सामुदायिक वैद्यकीय अधिकारी डॉ माधुरी सूर्यवंशी, डॉ पूजा बागुळे, डॉ निलेश सोनवणे, डॉ मोहसिन पटेल,आरबीएसके'चे एएनएम पुनम नारे, सुवर्णा राजपूत, अंमळगाव प्राथमिक आरोग्य केंद्राच्या आधीपरिचारिका श्रीमती एल व्ही चौधरी, नीना साळुंखे, अमळनेरच्या आधीपरिचारिका दिव्याभारती साळुंखे, मीनाक्षी परदेशी, 'आरबीएसके' चे औषध निर्माता गिरीश शिंदे, वैशाली पाटील हे 24 तास शिफ्ट ड्युटीमध्ये कार्यरत असणार आहे. डॉ बाबासाहेब आंबेडकर समाज कल्याण वस्तीगृहात स्वतंत्र विलगीकरण कक्ष स्थापन करण्यात आला आहे तसेच कोविड सेंटर च्या स्वच्छतासाठी तसेच इतर सुविधा सोई सुविधा पुरवण्यासाठी प्रांताधिकारी यांनी पालिकेचे उपमुख्याधिकारी संदीप गायकवाड यांची नोडल अधिकारी म्हणून नियुक्ती केली आहे. त्यांना सहकार्यासाठी स्वच्छता निरीक्षक संतोष बिऱ्हाडे, मुकादम अनिल बेंडवाल यांच्यासह बारा सफाई कर्मचाऱ्यांची ही नियुक्ती करण्यात आली आहे. 

कोरोनाचा वाढता प्रादुर्भाव लक्षात घेता शहरातील कंटेनमेंट झोनमध्ये वाढ केली आहे. यात इस्लामपुरा चा समावेश करण्यात आला आहे. शहरात कोरोना कोविड केअर सेंटरची स्थापना करण्यात आली आहे. आवश्यक सुविधांसह 200 पैकी 130 बेड तयार करण्यात आले आहे. माजी आमदार साहेबराव पाटील यांनी या सेंटरसाठी 100 गादी भेट दिल्या आहेत. त्यांचे प्रशासनाकडून आभार. 
-मिलिंदकुमार वाघ, तहसीलदार, अमळनेर.