वाडीवऱ्हे, काळुस्तेः भगताकडे उपचारासाठी नेलेल्या बालकाला श्रमजीवी संघटनेच्या कार्यकर्त्यांनी संबंधित पालकांना समजून सांगत रुग्णालयात दाखल करून जीवदान दिले. बालकाची तब्येत सुधारत आहे. 

त्र्यंबकेश्‍वर तालुक्‍यातील टाकेदेवगाव येथील धाराचीवाडी येथील दीड वर्षाच्या कुपोषित बालकाला रुणालयात दाखल करून काचेच्या पेटीत ठेवल्यानंतर त्याचे वजन वाढले. पण नंतर ते पुन्हा आजारी पडले. त्यामुळे त्याचे वजन घटले. त्याला तत्काळ हॉस्पिटलमध्ये दाखल करणे गरजेचे होते. अंगणवाडी कार्यकर्तीने या मुलाच्या आई-वडिलांना याबाबत समजावून सांगितले.

जरूर वाचा-मोबाईलमध्ये रोलेट,बिंगो जुगार सुरु होता...

आईवडीलांचा नकार 

रुग्णालयात जाण्यास आई-वडिलांनी नकार दिला. आमच्या बाळाला कोणीतरी भूतबाधा केली असून, आम्ही त्याला भागताकडे नेतो, असे सांगून रुग्णालयात नेत नव्हते. त्यामुळे बाळाची तब्येत खालावत होती. तरीही आई-वडील त्याला रुग्णालयात नेत नव्हते, याची माहिती श्रमजीवी संघटनेचे त्र्यंबकेश्‍वर तालुकाध्यक्ष भगवान डोखे यांना मिळाली. त्यांनी त्या बाळाचे घर गाठले. मात्र त्या बाळाला त्याची आजी सकाळीच तळेगाव (ता. इगतपुरी) येथील भगताकडे घेऊन गेली होती. 

अंधश्रध्देचे जीवंत उदाहरण
डोखे यांनी बाळाच्या आई-वडिलांची समजूत काढून बाळाला त्र्यंबकेश्‍वर येथील शासकीय ग्रामीण रुग्णालयात दाखल केले. नंतर त्या बाळाला जिल्हा रुग्णालयात दाखल करण्याची जबाबदारी श्रमजीवी संघटनेच्या तानाजी शिंदे यांनी घेतली आणि आता ते स्वतः बाळाला व बाळाच्या आईला घेऊन जिल्हा रुग्णालयात दाखल झाले. किती अंधश्रद्धा घट्ट आहे, याचे हे जिवंत उदाहरण आहे. त्या बाळाच्या आजीने बाळाला दवाखान्यात नाही, तर भक्ताकडे घेऊन जाण्याचा प्रयत्न केला. श्रमजीवी संघटनेने जिल्हा रुग्णालयाच्या प्रवेशद्वारावर अडवून बाळाला दाखल करून घेतले व आजीचा प्रयत्न हाणून पाडला.