भुसावळ (जळगाव) : शहरातील खडका रोड भागातील ३२ खोली रस्‍ता वळणावरील आशादिप बिल्‍डींगसमोर एका ४८ वर्षीय व्यक्तीचा जिल्हा रुग्णालयात उपचारादरम्यान मृत्यू झाला. मात्र, जिल्हा रुग्णालयातील कर्मचाऱ्यांनी काल (ता. २३) रात्रीच हा मृतदेह आणून रस्त्यावर ठेऊन पळ काढला. अंत्यसंस्कारासाठी नागरिकांना पालिका आणि आरोग्य प्रशासनाकडून मदत न मिळाल्याने तीव्र संताप व्यक्त होत आहे. 

शहरातील ३२ खोली भागातील ४८ वर्षीय व्यक्तीस गेल्या तीन दिवसांपासून जिल्हा रुग्णालयात उपचारार्थ दाखल करण्यात आले होते. काल (ता. २३) उपचारादरम्यान मृत्यू झाला. जिल्हा रुग्णालयातील कर्मचाऱ्यांनी रात्रीच मृतदेह रूग्‍णवाहीकेतून आणून घराबाहेर सोडून निघून गेले. मृताचे दोन भाऊ आहेत. मात्र ते मनोरुग्ण असल्याने हा मृतदेह रस्त्यावरच पडून होता. परिसरात निर्जंतुक फवारणी आणि उपाययोजना होणे आवश्यक असतांना नगरपरिषद प्रशासनाने दुर्लक्ष केले होते. संसर्गजन्‍य आजाराने मृत्‍यू झाल्‍याने अंत्‍यसंस्‍कार कसे करावे? असा प्रश्‍न उपस्‍थित झाला होता. सामाजिक कार्यकर्ते सचिन पाटील, साजीद शेख यांनी अंत्‍यसंस्‍कारासाठी नगराध्‍यक्ष रमण भोळे व मुख्‍याधिकारी करूणा डहाळे यांच्‍याशी संपर्क साधला असता, त्‍यांचे भ्रमणध्‍वनी बंद होते. नगरपरिषद रूग्‍णालयाच्‍या महिला वैद्‍यकिय अधिकारी डॉ. किर्ती फलटणकर यांच्‍याशी संपर्क साधून कर्मचारी व शववाहिनीची मागणी केली. मात्र त्‍यांनी त्‍यास नकार दिला. पीपीई किटची मागणी त्‍यांनी मान्‍य करून दोन किट उपलब्‍ध करून दिले. परिसरातील काही हिंदू-मुस्लिम बांधवांनी शेवटी मृतदेह नेत अंत्‍यसंस्‍कार केले. 

मृत व्यक्तीसोबत रुग्णालयाने सारी आजाराने मृत्यू झाल्याचे प्रमाणपत्र दिले आहे. त्यामुळे मृतदेहाची हाताळणी करणे धोकादायक होते. यासाठी पालिका आणि आरोग्य प्रशासनाची मदत आवश्यक होती. मात्र, ती मिळू शकली नाही. शेवटी परिसरातील रहिवाशांनीच पीपीइ कीट घालून मृतदेहावर अंत्यसंस्कार केले. 
- सचिन पाटील, सामाजिक कार्यकर्ते, भुसावळ.