जळगाव : राजधानी दिल्लीतील निजामुद्दीन येथील "तबलीग जमात'च्या आंतरराष्ट्रीय संमेलनात जळगाव जिल्ह्यातील 13 तर धुळे जिल्ह्यातून 7 जण सहभागी झाले होते. पंधरा दिवसांपूर्वीच सर्व जण घरी परतल्याची माहिती समोर आली आहे. जिल्हा प्रशासनाला याची माहिती प्राप्त झाल्यावर त्या सर्वांची माहिती संकलित करून त्यांच्या यापूर्वीच तपासण्या झाल्या. त्यापैकी एकही जण "पॉझिटिव्ह' नाही, अशी अधिकृत माहिती प्राप्त झाली आहे. 
दिल्ली येथील "तबलीग जमात'च्या संमेलनासाठी जिल्ह्यातून 13 जण सहभागी झाले असल्याची माहिती दिल्लीतून प्राप्त झाल्यावर जिल्ह्याची यंत्रणा सकाळपासून या लोकांच्या शोधात होती. त्यातील सर्वांची नावे निष्पन्न झाली असून, त्यापैकी कोणीही "पॉझिटिव्ह' नसल्याची अधिकृत माहिती वैद्यकीय सूत्रांनी दिली. 

असे आहेत तेरा जण 
जळगाव - 2, भुसावळ- 3, चोपडा- 1 एरंडोल- 1, यावल- 2, पाचोरा (लोहारा)- 1, अमळनेर (हिंगोणे)- 1, धरणगाव- 1, चाळीसगाव- 1 अशी माहिती जिल्हा प्रशासनाला मिळाल्यानुसार संबंधितांचा तपास लावण्यात आला. चौकशीत या 13 जणांपैकी 2 जण दिल्ली येथेच असून ते तेथे नोकरीला आहेत तर दोन जण नाशिक येथे गेले आहेत. भुसावळ शहरात 2 जण आहे. जळगाव शहरातील 2 जण असून, या सर्वांची वैद्यकीय तपासणी झाली आहे. कोणालाही "कोरोना'ची लागण झालेली नसल्याचा अहवाल प्राप्त झाला आहे. नाशिक व भुसावळ येथील लोकांनीही वैद्यकीय तपासणी झालेली आहे. 

...म्हणून झाला उशीर 
जिल्हा व पोलिस प्रशासनाला प्राप्त तेरा जणांच्या यादीतील काहींचे मोबाईल क्रमांक चुकीचे असल्याने सर्वांची माहिती संकलित करून खात्री करण्यासाठी कसरत करावी लागली. खूप मेहनत घेतल्यावर खात्रीशीर माहिती हाती आल्याचे प्रशासनाने कळविले. आलेल्या यादीतील सर्वच्या सर्व लोक बारा ते पंधरा दिवसांपूर्वीच त्यांच्या घरोघरी पोचल्याचीही माहिती प्राप्त झाली.