धुळे : "कोरोना' विषाणूचा संसर्ग रोखण्यासाठी प्रथम जमावबंदी, नंतर संचारबंदीचा आदेश लागू झाला. असे असताना अत्यावश्‍यक सेवा वगळता आठ ते दहा व्यावसायिकांनी आपापली दुकाने सुरू ठेवली. मनाई आदेशाचे उल्लंघन केल्याने त्यांच्यावर पोलिसांनी प्रतिबंधात्मक कारवाईचा बडगा उगारला आणि पोलिस ठाण्यात गुन्हा दाखल करत इतर व्यावसायिकांना योग्य तो इशारा दिला. 
सरकारने दवाखाने, रुग्णालये, मेडिकल दुकान, किराणा दुकान, भाजीपाला व दूध विक्री आदी अत्यावश्‍यक सेवा वगळून इतर प्रकारच्या विक्रेत्यांना "बंदी' घातली आहे. यामागे गर्दी टळून संसर्ग पसरणार नाही, असा उद्देश आहे. तरीही काही दुकानदारांनी आदेशाचे पालनच केले नाही. त्यात पोलिसांनी आज (मंगळवारी) सकाळी शहरातील पाचकंदील, आग्रा रोड परिसर, पारोळा रोड, आझादनगर पोलिस ठाण्याच्या हद्दीत व्यावसायिक, विक्रेत्यांविरूध्द थेट गुन्हे दाखल केले. त्यामुळे व्यावसायिक, दुकानदारांचे धाबे दणाणले आहेत. 
आग्रा रोडवरील चहा विक्रेता कैलास हटकर, शेरे पंजाब हॉटेलजवळ राजेश शांतिलाल अग्रवाल, पारख लॉजजवळ मोबाईल दुकानदार सूरज भगवान अपूर्बा, ऐंशी फुटी रोडवरील शिवकुटीयाजवळ नाश्‍ता सेंटरचालक शंभू मोहन लहामगे, पारोळा रोडवरील ज्योतिष कार्यालय सुरू ठेवणारा बाबूलाल प्रभुदयाल शर्मा, कृषी बाजार समितीजवळील सलून व्यावसायिक मालक महेश उत्तम महाले यांच्यावर ही कारवाई झाली. त्यांनी दुकान सुरू ठेवल्याने गर्दी होती. 

नरडाणा पोलिसांकडून कारवाई 
नरडाणासह (ता. शिंदखेडा) इलेक्‍ट्रीक दुकानदार अनिल शांतिलाल जैन (रा. बेटावद), रसवंती चालक समाधान मधुकर पाटील (रा. वारूड), स्वीट सेंटर विक्रेता प्रमोद मुरलीधर बोरसे (रा. नरडाणा) यांनी बंदी आदेशाचे उल्लंघन करून आपली दुकाने सुरू ठेवली. त्यांच्याविरुद्ध नरडाणा पोलिस ठाण्यात गुन्हा दाखल झाला.