धुळे : वेतन देण्याची शिफारस करताना शाळा दुरूस्तीच्या नावाखाली 42 हजाराची लाचेची रक्कम तक्रारदाराकडून स्विकारताना लालची मुख्याध्यापिकेला लाचलुचपत प्रतिबंधक विभागाच्या पथकाने ताब्यात घेतले. 
 
शहरात हाजी लुकमान उर्दू प्राथमिक शाळा आहे. तेथील शिक्षकाचे मे महिन्याचे वेतन बॅंक खात्यात जमा होण्यासंदर्भात मुख्याध्यापिका निकहत नसरी अ. लतीफ (वय 40, रा. कामगारनगर, हजार खोली, धुळे) यांच्याकडे प्रस्ताव सादर होता. तिने शिक्षकाचे वेतन बॅंक खात्यात जमा करताना तीन महिन्यातील शाळा दुरूस्तीच्या नावाखाली 42 हजाराची लाच मागितली. यासंदर्भात संतप्त तक्रारदार शिक्षकाने लाचलुचपत प्रतिबंधक विभाग गाठले व तक्रार नोंदविली. 
या पार्श्‍वभूमीवर लाचलुचपत प्रतिबंधक विभागाच्या येथील पथकाने सापळा रचला. कारवाईत तक्रारदाराकडून 42 हजार 100 रूपयांची लाच स्विकारताना मुख्याध्यापिकेला पकडले. या विभागाचे नाशिक विभागीय पोलिस अधीक्षक सुनील कडासने, अपर पोलिस अधीक्षक निलेश सोनवणे यांच्या मार्गदर्शनाखाली येथील पोलिस उपअधीक्षक सुनील कुऱ्हाडे, पोलिस निरीक्षक प्रकाश झोडगे, मंजितसिंग चव्हाण, संतोष हिरे, संदीप सरग, कृष्णकांत वाडीले, सुधीर सोनवणे, जयंत साळवे, प्रकाश सोनार, शरद काटके, प्रशांत चौधरी, भूषण खलाणेकर, संदीप कदम, भूषण शेटे, सुधीर मोरे यांनी ही कारवाई केली.