धुळे : शहरात गांजा विक्रीसाठी (cannabis sellers) आलेल्या दोघांना शहर पोलिसांनी (Dhule City Police) सूरत बायपासवर सापळा रचत पकडले. त्यांच्याकडून पाच लाखांची कार व ९३ हजारांचा ओला गांजा जप्त केला. संशयित दोघांविरोधात गुन्हा दाखल केला.

शहर पोलिस ठाण्याचे निरीक्षक नितीन देशमुख यांना शहरात हिरे मेडिकल कॉलेजजवळ सुरत बायपासवरील पुलाखाली दोन व्यक्ती कारमधून (एमएच १८ बीसी २८३२) गांजाची वाहतूक करून त्याच्या चोरट्या विक्रीसाठी येणार असल्याची माहिती मिळाली. त्यानुसार कारवाईसाठी पथक तयार केले. पथकाने दुपारी तीनच्या सुमारास घटनास्थळी छापा टाकत कारवाई केली. कारचालक संशयित कुणाल दिलीप बिडगर (वय २६, रा. गुजर खर्दे, ता. शिरपूर) व हर्षवर्धन गोकूळ जगदाळे (वय २१, रा. मोगलाई, कोंडाजी विजय व्यायामशाळेजवळ, धुळे, ह. मु गुजर खर्दे, ता. शिरपूर) यांना पकडले. कारची तपासणी केली असता डिक्कीत १८ किलो ओला गांजा मिळून आला. त्याची किंमत ९३ हजार ३७० रुपये आहे. गांजा व पाच लाखांची कार, असा पाच लाख ९३ हजार ३७० रुपयांचा मुद्देमाल जप्त केला.

ही कारवाई पोलिस अधीक्षक चिन्मय पंडित, अपर पोलिस अधीक्षक प्रशांत बच्छाव, उपविभागीय पोलिस अधिकारी दिनकर पिंगळे यांच्या मार्गदर्शनाखाली शहर पोलिस निरीक्षक नितीन देशमुख, सहाय्यक पोलिस निरीक्षक दादासाहेब पाटील, संतोष तिगोटे, श्रीकांत पाटील, नाना आखाडे, नितीन अहिरे, भिका पाटील, मुक्तार मन्सूरी, प्रल्हाद वाघ, मनीष सोनगिरे, तुषार मोरे, पंकज खैरमोडे, प्रसाद वाघ, गुणवंत पाटील, प्रवीण पाटील, विवेक साळुंखे, नीलेश पोतदार, अविनाश कराड, शाकीर शेख यांच्या पथकाने केली.