नेर : शहरातील देवपूर भागात एकविरा देवी मंदिराजवळ ही दुर्दैवी घटना घडली.भरधाव वेगाने जाणारे ट्रॅक्टरचे पुढील चाक निघाल्यामुळे ट्रॅक्टर एका दुचाकीवर जाऊन धडकले.या मोठ्या अपघातात बाप-लेकराचा जागीच मृत्यू झाला.तर आई व मुलगा हे जखमी झाले आहेत. या प्रकरणी देवपूर पोलिस ठाण्यात ट्रॅक्टर चालकाविरुद्ध गुन्हा दाखल करण्यात आला आहे.
(dhule two-wheeler accident father son death)

शहरातील देवपूर भागात पांझरा नदी लगत असलेल्या शंभर फुटी रस्त्यावरून शनिवारी प्रभात नगर कडून वीर सावरकर पुतळ्याकडे भरधाव वेगात ट्रॅक्टर (एमएच 19/सी.8656) हे जात होते. ट्रॅक्टरचे अचानक पुढील चाक निघाल्याने चालकाचे नियंत्रण सुटल्यामुळे ते एकवीरा देवी मंदिरा बाजूला वळाले. याच वेळी तेथून जाणाऱ्या दुचाकी (एमएच 46/एस 514) ट्रॅक्टरने जोरदार धडक दिली. या मोठ्या अपघातात दुचाकीवरील नेर येथील रहिवाशी हेमंत भगवान बोडरे वय 40 त्यांची पत्नी अनिता हेमंत बोडरे, मुलगा विवेक(साई) हेमंत बोडरे वय 9,मुलगा उत्कर्ष हेमंत बोडरे हे सर्व काही वर्षांपासून तिरुपती नगर देवपुर धुळे या ठिकाणी वास्तव्यास होते.

दुचाकीवर आपल्या घरी जात असताना या अपघातात ट्रॅक्टर खाली येऊन गंभीर जखमी झाले. त्यांना तेथील परिसरातील नागरिकांनी तातडीने देवपूर येथील एका खाजगी रुग्णालयात दाखल केले. रुग्णालयात उपचारा दरम्यान हेमंत बोडरे व विवेक(साई) बोडरे या बाप लेकराचा मृत्यू झाला.तर पत्नी अनिता बोडरे व मुलगा उत्कर्ष बोडरे त्यांच्यावर उपचार सुरू आहेत.अपघातात दुचाकीचेही मोठे नुकसान झाले आहे. या अपघातानंतर ट्रॅक्टर चालक घटनास्थळावरून पसार झाला आहे. याप्रकरणी शुभम मटकर यांच्या फिर्यादीवरून ट्रॅक्टर चालकाविरुद्ध गुन्हा दाखल केला आहे.