यावल : चिंचोल (ता. मक्ताईनगर) येथील नवविवाहित मुलीचा स्वागत समारंभाचा (रिसेप्शन) कार्यक्रम चोपडा येथून आटपून घराकडे परतणाऱ्या वऱ्हाडाच्या कुटुंबीयांवर काळाने घाला घातला. तालुक्‍यातील हिंगोणा येथे राखेने भरून येणाऱ्या भरधाव डंपरने क्रुझरला समोरुन जोरात धडक दिल्यामुळे दहा जण जागीच ठार, तर सात जण जखमी झाल्याची हृदयद्रावक घटना घडली आहे. 

गाडीचा चुराडा 
चोपडा- यावल रस्त्यावर डंपर आणि क्रुझर गाडीचा अपघात एवढा भीषण होता की क्रूजर गाडीचा अक्षरश चुराडा झाला आहे. तर डंपर चालक वाहन सोडून पसार झाला. मृतांमध्ये नऊ महिला तर एक पुरुष आहेत. सर्व जखमींना सावदा येथे खासगी रुग्णालयात आणले जात असताना बहुतेक जण रस्त्यात मृत झाले होते. मृत सहा जणांना उत्तरीय तपासणीसाठी येथे ग्रामीण रुग्णालयात आणण्यात आले आहे. 

मृत झालेले व्यक्‍ती 
मृतांची नावे याप्रमाणे प्रभाबाई प्रभाकर चौधरी (वय 45), सोनाली जितेंद्र चौधरी (वय 35), मंगलाबाई ज्ञानेश्वर चौधरी (वय 55), आश्‍लेषा उमेश चौधरी (वय 28), प्रभाकर नारायण चौधरी (वय 63), रिया जितेंद्र चौधरी (वय 10), प्रियांका नितीन चौधरी (वय 25, सर्व रा. चिंचोल, ता. मुक्ताईनगर), सुमनबाई श्रीराम पाटील (वय 60), संगीता मुकेश पाटील (वय 33, दोघ रा. निंबोल ता. रावेर), सोनल सचिन महाजन (वय 37, रा. चांगदेव,ता. मुक्ताईनगर) हे ठार आहेत. तर जखमींमध्ये सर्वेश नितीन चौधरी, शंतनू मुकेश पाटील ,अन्वी नितीन चौधरी, मीना प्रफुल्ल चौधरी, सुनिता राजाराम चौधरी, आदिती मुकेश पाटील आणि शिवम प्रभाकर चौधरी (वय 16) येथे ग्रामीण रुग्णालयात चिंचोली तालुका मुक्ताईनगर येथील ग्रामस्थांनी गर्दी केली होती. घटनेचे वृत्त कळताच माजी आमदार हरिभाऊ जावळे, नगरसेवक डॉ. कुंदन फेगडे, बाळू फेगडे, भाजपचे शहराध्यक्ष नीलेश गडे, भाजपचे तालुकाध्यक्ष उमेश फेगडे, यांचेसह विविध पदाधिकाऱ्यांनी ग्रामीण रुग्णालयात येऊन मृतांच्या नातेवाईकांचे सांत्वन केले. त्यांना आवश्‍यक असणारी मदत दिली.