भडगाव : मुलीच्या जन्माचे स्वागत सिन्नर तालुक्यातील चिंचोली येथे अनोख्या पद्धतीने करण्यात आले. जन्माला आलेल्या मुलीच्या पायांनी उंबऱ्यातील धान्याचे माप ओलांडण्यात आले. तसेच तिची चिमुकली कुंकवाची पावले लक्ष्मीची पावले समजून घरामध्ये उमटविण्यात आली. 

येथील नगरपरिषदेचे मुख्याधिकारी विकास नवाळे यांना कन्यारत्न प्राप्त झाले. त्यांच्या कुटुंबात मुलीचे पहिल्यांदाच आगमन झाल्यानंतर हा अनोखा कार्यक्रम करण्यात आला.

मुलगी झाल्याने अनेकजण नाराज होतात. तर अनेक जण मुलीचा गर्भ असल्यास गर्भपात करत असतात. परंतू, भडगाव नगरपरिषदेचे मुख्याधिकारी विकास नवाळे यांनी कन्यारत्न झाल्यानंतर देखील तिचे जल्लोषात स्वागत केले. कन्या सन्नीधीचे रविवारी (ता.18) चिंचोली (ता.सिन्नर) येथे आपल्या घरी असे सुंदर स्वागत केले.

मुलगी ही घराची लक्ष्मी असते म्हणून तिच्या गृहप्रवेशाचे लक्ष्मी पावलांनी स्वागत केल्याचे मुख्याधिकारी विकास नवाळे यांनी सांगितले. त्यांच्या या आगळ्या वेगवेगळ्या स्वागत चर्चेची विषय ठरले आहे. त्यांचे सर्वत्र कौतुक होत आहे.