मुक्ताईनगर : रिगाव (ता. मुक्ताईनगर) शिवारातील उसाच्या शेतात उसतोडणी करणाऱ्या मजुरांना बिबट्याचे दोन बछडे आढळून आल्याने त्यांची चांगलीच भंबेरी उडाली. त्यामुळे मजुरांसह शेतकऱ्यांमध्ये सुद्धा दहशत पसरली असून, वनविभाग तत्काळ हालचाल करत परिस्थिती नियंत्रणात आणून याबाबीकडे लक्ष ठेवून आहे. 
रिगाव-कोऱ्हाळा रस्त्यावरील रिगाव गावापासून काही अंतरावर असलेल्या गट क्रमांक आठमध्ये संतोष विटे यांच्या शेतात आज उस तोडण्याचे काम सुरु होते. निम्म्यापेक्षा कमी शेतातील उसाची तोडणी कामगारांनी केली. या दरम्यान सकाळी दहाला अचानक बिबट्याचे दोन बछडे उस तोडणी कामगारांच्या समोर आले आणि कामगारांची बोबडीच वळली. भीतीने ते घामाघूम झाले. ही घटना वाऱ्यासारखी गावात पसरली आणि शेकडोच्या संख्येने गावकरी घटनास्थळी बिबट्याची पिल्ले पाहण्यासाठी हजर झाली. याबाबत वनविभागाला कळविल्यानंतर वनविभागाचे वनक्षेत्रपाल अमोल चव्हाण, वनपाल ए. जी. पाटील, पी. टी. पाटील, डी. जी. पाचपांडे, वनरक्षक सुप्रिया देवरे, धोंडीबा धुळगुंडे, रहीम तडवी, राम आसुरे, विजय अहिरे यांच्यासह वनमजूर यांनी घटनास्थळी जाऊन पाहणी केली. 

उस तोडणी बंद 
यावेळी जमलेल्या शेतकऱ्यांना वनक्षेत्रपाल चव्हाण यांनी एक- दोन दिवस उस तोडणी थांबविण्याचे आवाहन केले. या प्रकारामुळे शिवारातील शेतकऱ्यांमध्ये भीतीचे वातावरण निर्माण झाले आहे. शेतातील पिकांना रात्री पाणी कसे द्यावे हा प्रश्न शेतकऱ्यानसमोर असून, शेती शिवारातील वीजपुरवठा दिवसा सुरु ठेवावा, अशी मागणी शेतकऱ्यांनी केली आहे. 

वनविभाग लक्ष ठेवून 
सकाळपासूनच वनविभागाचे कर्मचारी घटनास्थळी दाखल झाले होते. त्यांनी आजूबाजूच्या परिसरात कॅमरे लावले आहेत. बिबट्याची मादी पिल्लांना सुरक्षित स्थळी नेईपर्यंत सर्व घडामोडींवर लक्ष ठेवले जाणार असून, बिबट्याची मादी जर आलीच नाही तर या पिल्लांच्या सुरक्षेसाठी वन विभागाकडून पर्यायी योग्य पाऊले उचलली जातील तोपर्यंत शेतकरी व नागरिकांनी सहकार्य करण्याचे आवाहन वनक्षेत्रपाल अमोल चव्हाण, वनपाल ए. जी. पाटील यांनी केले आहे.