खासदार ए. टी. पाटील. सलग दुसऱ्यांदा जळगाव मतदारसंघातून खासदार झालेल्या ए. टी. नानांचा त्यांची तंदुरुस्ती व व्यक्तिमत्त्वावरून लोकसभेत "दक्षिणेतील अभिनेता' म्हणून गमतीने उल्लेख होतो; परंतु त्यांच्या या तंदुरुस्तीमागे पहाटे नियमित उठून चालण्यासह योगासने, प्राणायाम आणि संतुलित आहार हे घटक आहेत. अगदी मतदारसंघात फिरतानाही ते सोबत जेवणाचा डबा ठेवतात. रात्री उशीर झाला तर फळे, दूध घेऊन विश्रांती घेतात. त्यातून त्यांनी शारीरिक व मानसिक तंदुरुस्ती राखलीय... 
 

खासदार ए. टी. पाटील सुरवातीपासूनच आपल्या स्वास्थ्याविषयी कमालीचे जागरूक आहेत. खासदार होण्यापूर्वी ते पारोळ्याचे नगराध्यक्ष होते. विधान परिषदेची निवडणूकही त्यांनी लढविली होती. राजकारणात असल्यामुळे नेहमीच निवासस्थानी कार्यकर्त्यांची गजबज. खासदार झाल्यापासून गेल्या नऊ- दहा वर्षांत तर त्यांच्या कामांचा व्याप अधिकच वाढला. संसदेचे अधिवेशन, विविध समित्यांवर असल्याने त्या समित्यांच्या बैठकांसाठीही सारखे दिल्लीला जावे लागते. शिवाय, लोकसभा मतदारसंघ असल्याने त्याची व्याप्ती, संपर्क, रोज कार्यकर्त्यांसह नागरिकांशी संपर्क व संवाद यासाठी प्रचंड ऊर्जा लागते. त्यातून तणावाचे प्रसंगही निर्माण होते. त्यासाठी ए. टी. नानांनी प्रकृतीवर विशेष भर दिला आहे. 
पहाटे पाचला उठून फ्रेश झाल्यानंतर रोज दोन किलोमीटर चालणे, नंतर काही योगासने व प्राणायाम करणे, सकाळी साडेआठपर्यंत तयार होऊन पोहे, उपमा, उसळ असे पदार्थ नाश्‍त्याला असतात. चहा शक्‍यतो टाळणे, घेतला तरी कमी साखरेचा व मर्यादित. दुपारचे जेवण एक ते दोनच्या दरम्यान. मतदारसंघात दौऱ्यावर असले तरी घरून जेवणाचा डबा सोबत घेतला जातो. रोजच्या जेवणात पालेभाज्या, पोळी. क्वचित वेळा मसाल्याची भाजी असते. सायंकाळी थोडा चहा, भूक असेल तर नाश्‍ता. रात्रीचे जेवण आठ ते नऊदरम्यान; परंतु, रात्रीच्या जेवणात हलका आहार. घरी येण्यास रात्री उशीर झाला तर केवळ फळे अथवा दूध घेऊन झोपणे, असा ए. टी. पाटलांचा दिनक्रम असतो. हलका व्यायाम, प्राणायाम आणि संतुलित आहारामुळे नानांची प्रकृती ठणठणीत आहे. वेळ मिळाल्यानंतर काही आवडत्या पुस्तकांचे वाचन, जुन्या चित्रपटातील गीते ऐकणे, हा छंदही आपले मानसिक आरोग्य राखतो, असे नाना आवर्जून सांगतात.