जळगाव : दृष्टिहीनांना ज्ञानाचे पंख देणाऱ्या ब्रेल लिपीचे जनक लुई ब्रेल यांच्या संशोधनामुळे अनेक प्रज्ञाचक्षूंच्या जीवनात आशेचा किरण प्राप्त झाला. मराठी साहित्यही प्रज्ञाचक्षूंपर्यंत पोहोचावे म्हणून चाळीसगावच्या शिक्षकाने अशा अनेक दर्जेदार साहित्याची "दृष्टी' या लिपीतून उपलब्ध करून दिलाय. आंतरराष्ट्रीय ब्रेल लिपी दिनाच्या औचित्याने या किमयागार शिक्षकाच्या कार्याचे कौतुकच करावे लागेल. 
राष्ट्रीय शिक्षण प्रसारक मंडळ संचलित राष्ट्रीय अंधशाळेचे विशेष शिक्षक सचिन सोनवणे यांनी विद्यार्थ्यांना ब्रेल लिपीतून अनेक कविता, दर्जेदार साहित्य आदी वैचारिक मेजवानी उपलब्ध करून दिली आहे. अंध विद्यार्थ्यांमध्ये मराठी साहित्य वाचनाची इच्छा असूनही सहजासहजी त्याना ते उपलब्ध होत नाही ही बाब राष्ट्रीय शिक्षण प्रसारक मंडळ संचलित राष्ट्रीय अंधशाळेचे विशेष शिक्षक सचिन सोनवणे यांनी ओळखून त्याच्यातील मराठी आणि साहित्याबद्दल न्युनगंडात भर पडू नये काही पुस्तके ब्रेल लिपीतून विकसित करत उपलब्ध करुन दिली आहेत. यात पु. ल. देशपांडेंची बटाट्याची चाळ, अखेर कमाई, याचक, मौन, सातवा, सहानुभूती, पाचोळा या कविताही साकारल्या असून त्यांचेही वाचन विद्यार्थी करीत आहेत. प्रज्ञाचक्षू विद्यार्थ्यांच्या शालेय जीवनातील आठवणी सदैव जपण्यासाठी स्लॅम बुक, यासह अब्राहम लिंकनचे मुख्याध्यापकास पत्र, डॉ. सर्वपल्ली राधाकृष्णन यांचे संपूर्ण चरित्रही ब्रेल लिपीत सोनवणे यांनी साकारले आहे. 

ज्ञानज्योतीचे व्रत 
कविश्रेष्ठ कुसुमाग्रजांच्या विशाखा व प्रवासी पक्षी या सुप्रसिद्ध कविता संग्रहातील कणा व जालियनवाला बाग यासह अनेक कविता, माजी राष्ट्रपती प्रतिभाताई पाटील की जीवनी या जीवनपटावर आधारित हिंदी कोलाज ब्रेल लिपीत साकारुन या विद्यार्थ्यांचे आयुष्य ज्ञानज्योतीने प्रकाशमय करण्याचा प्रयत्न सोनवणेंनी केला आहे. यामुळे केवळ अभ्यासाच्या पुस्तकात रमणाऱ्या या विद्यार्थ्यांमध्ये आता मराठी साहित्याचीही गोडी निर्माण होत आहे