जळगाव : शहरातील सिंधी कॉलनीतील तरुणाला जुगाराचा नाद जडला आहे. जुगार खेळण्यासाठी छोट्या-मोठ्या चोऱ्या करुन त्यातून आपला नाद तो भागवत होता. जुगारात झालेले 25 हजारांचे कर्ज फेडण्यासाठी या तरुणाने चक्क गल्लीतील दुचाकी चोरल्याचे आढळून आले. सीटीव्ही फुटेज मध्ये संशयीत तरुणाची ओळख पटवून गुन्हेशाखेने त्याला अटक केली. 

जळगाव शहरातील सिंधी कॉलनीतून बुधवार(ता.22) अज्ञात चोरट्याने होंडा ऍक्‍टीव्हा दुचाकी (एमएच.19बीडब्लू 0503)चोरुन नेली होती. एमआयडीसी पेलिसांत गुन्ह्याची नोंद करण्यात आली.चोराचा शोध घेत असतांना गुन्हेशाखेच्या पथकाने परिसरातील सीसीटीव्ही फुटेज संकलीत करुन परिसरातील तरुणांना फुटेज दाखवल्यावर दुचाकी नेणाऱ्या तरुणाची ओळख पटली. प्रशांत रविंद्र हेमणानी (वय-25 कंवर नगर) हा तरुण दुचाकी घेवुन जातांना ओळख पटल्यामुळे गुन्हेशाखेचे निरीक्षक बापु रोहोम यांच्या पथकातील संजय हिवरकर, प्रमोद लाडवंजारी, राजेश मेंढे, किरण धनगर, अशांच्या पथकाने प्रंशात ला ताब्यात घेतले सुरवातील उडवा उडवीची उत्तरे देणाऱ्या प्रमोदला पोलिसी खाक्‍या दाखवताच त्याने गुन्ह्याची कबुली दिली. 

जुगाराचे कर्ज फेडण्यासाठी चोरी 
प्रशांत हेमलणानी हा चांगल्या घरातील तरुण असून त्याला जुगाराचे नाद आहे. जुगार खेळण्यासाठी सुरवातील घरातून लहान मोठ्या चोऱ्या करुन तो जुगार खेळत होता. तरी त्याच्यावर 25 हजारांचे कर्ज शिल्लक असल्याने त्याने दुचाकी चोरण्याचा निर्णय घेतला. चोरलेली ऍक्‍टीव्हा दुचाकी 15 हजारात विकण्याच्या तयारीत असतांनाच पोलिसांनी त्याला अटक केली.