पहूर (ता. जामनेर) : ग्रुप ग्रामपंचायत पहूर पेठमधील नवीन बांधकाम सुरू असलेल्या पाण्याच्या टाकीवरून काम करत असताना तोल जावून खाली पडल्याने एका मजुराचा मृत्यू झाला. तर अन्य दोन जण जखमी झाल्याची घटना आज घडली. 

पहूर पेठ ग्रामपंचायती अंतर्गत बांधकाम सुरू असलेल्या नवीन पाण्याच्या टाकीवरून टायपिंग काम करत असलेले जळगाव येथील अशोक सपकाळे (वय 55), वासुदेव पाटील, सुभाष जोहरे या कामगारांचा काम सुरू होते. काम करत असताना तोल जाऊन ते खाली पडले. यातील अशोक सपकाळे यांचा जागीच मृत्यू झाला. त्यांच्यासोबत असलेले वासुदेव पाटील यांच्या पायात आसारी घुसल्याने ते गंभीर जखमी आहेत; तर सुभाष जोहरेदेखील जखमी झाले आहेत. त्यांना तात्काळ ग्रामीण रुग्णालयात दाखल करण्यात आले. घटनेची माहिती मिळताच माजी कृषी सभापती प्रदीप लोढा, माजी जिल्हा परिषद सदस्य राजधर पांढरे, रामेश्वर पाटील, उपसरपंच श्‍याम सावळे व ग्रामस्थांनी धाव घेतली. जखमींवर प्राथमिक उपचार करून त्यांना जिल्हा रुग्णालय जळगाव येथे पाठविण्यात आले आहे.