जळगाव : भाजपचे नेते एकनाथराव खडसे यांचे तिकीट कोणी कापले ते त्यांनी पहावे, त्यांनी नावे जाहिर केली आहेत. विधानसभेत जळगाव जिल्ह्यात शिवसेनेविरूध्द बंड करून उमेदवारी करणाऱ्या भाजपच्या लोकांची नावे आम्हीही जाहिर केली होती. त्यांनी त्यांच्यावर काहीच कारवाई केली नाही. भाजपवाल्यानी या बंडखोरांना मांडीवर बसविले असा आरोप राज्याचे मंत्री व शिवसेना उपनेते गुलाबराव पाटील यांनी केला. 
जळगाव येथे पत्रकारांशी बोलतांना ते म्हणाले,खडसे यांचे तिकीट कोणी कापले हे त्यांनी तपासावे त्यांच्या पक्षाच्या तो अंतर्गत विषय आहे. त्यांनी नावे जाहिर केली असतील तर पक्षाने त्यांच्यावर कारवाई करावी.बंडखोरी तर भाजपमध्ये मुळातच आहे. विधानसभा निवडणूकीत युती असतानाही भाजपने शिवनेच्या जिल्हयातील चारही उमेदवारांच्या विरूध्द बंडखोर उभे केले होते. विशेष म्हणजे या बंडखोरांच्या बॅनरवर पंतप्रधान नरेंदी मोदी, माजी मुख्यमंत्री देवेंद्र फडणवीस, माजी मंत्री गिरीश महाजन यांचे फोटो होते. गळयात भाजपचे गमछे होते. आमचे कार्यकर्ते पक्के होते, म्हणून आमचे उमेदवार या बंडखोरांच्या छाताडावर पाय ठेवून विजयी झाले. मात्र या बंडखोरावर भाजपने कोणतीही कारवाई केलेली नाही. उलट त्यांनी त्यांना त्यांना मांडीवर घेतले आहे. त्यामुळे भाजप बंडखोरावर कोणतीही कारवाई करीत नाही, तर त्यांना मांडीवरच घेते. 

जळगाव पंचायतवर शिवसेनेचा झेंडा 
पंचायत समितीच्या सभापती, उपसभापती पदासाठी आज निवड प्रक्रिया राबविण्यता आली. सदर निवड बिनविरोध झाली असून, पदी शिरसोली गणाचे नंदलाल पाटील तर उपसभापतीपदी म्हसावद गणाच्या संगीता चिंचोरे या दोघांची बिनविरोध निवड करण्यात आली. सभापती व उपसभापती निवडीसाठी एक- एकच अर्ज होते. यात सभापती पदासाठी नंदलाल पाटील यांच्या नावासाठी ललीता सोनवणे तर संगीता चिंचोरे यांच्या नावासाठी जागृती चौधरी सुचक होते. एक- एकच अर्ज असल्याने दोघांचीही निवड बिनविरोध करण्यात येत असल्याचे पिठासन अधिकारी आहेर यांनी घोषित केले.