कहाटूळ : कांद्याला भाव चांगला मिळेल, या आशेने हजारो रूपये खर्च करून तीन एकर क्षेत्रावर कांदा लावला, कांद्याचे भरघोस उत्पादनही आले. मात्र ते काढण्यासाठी मजूर मिळत नाही. ही समस्या गंभीर असतांना व्यापाऱ्यांकडून कांद्याला कवडीमोल भाव मिळत आहे. त्यामुळे मजुरीही सुटणार नाही. त्यापेक्षा कांदा ग्रामस्थांना मोफत वाटलेला बरा, असे म्हणत कहाटूळ (ता. शहादा ) येथील शेतकऱ्याने तीन एकरवरील परिपक्व झालेला कांदा लागेल त्याने उपटून घेऊन जाण्याचे आवाहन केले आहे. 
मागील दोन महिन्यापासून लॉकडाऊन आहे. विशेषत: नाशवंत शेतीमाल उत्पादक शेतकरी लॉकडाउनमुळे अडचणीत आले आहे. कांदा उत्पादक शेतकऱ्यांनी पीक उभे करण्यासाठी लाखो रुपये खर्च करूनही मातीमोल भावात ते विकावे लागले, तर काही शेतकऱ्यांना ग्रामस्थांना शेतात बोलवून कांदे वाटप करण्याची वेळ शहादा तालुक्यात निर्माण झाली आहे. 

एक एकरामागे लावणीपासून मळणीपर्यंत ३० हजार रुपये खर्च करावा लागतो. जानेवारीपासून शेतकरी राबत होता. सध्या कांद्याची मागणी थांबली असल्यामुळे लागवडीचा खर्च देखील निघत नाही. व्यापाऱ्यांकडून मातीमोल भावात मागणी होत आहे. यामुळे शेतकऱ्यांना आर्थिक फटका बसत आहे त्यामुळे शेतकऱ्याने उद्विग्न होत निर्णय घेतला आहे.शासनाने नुकसानग्रस्त शेतकऱ्यांना पंचनामे करून कोरोणा अनुदान जाहीर करावे, अशी मागणी कांदा उत्पादक शेतकऱ्यांकडून होत आहे. 
 
मी तीन एकर क्षेत्रात कांद्याची लागवड केली होती. यंदा शेतीदेखील चांगली बहरली होती. मात्र कोरोनामुळे होत्याचे नव्हते झाले, संचारबंदी सुरू असल्याने कांद्याची निर्यात होऊ शकली नाही. शेतातील एक किलो देखील कांदा विक्रीला गेलेली नाही. सरासरी एकरी एक लाखाचे नुकसान झाले आहे. नाइलाजाने गावातील नागरिकांना शेतातून कांदा उपटून घेऊऩ जाण्याचे आवाहन केले आहे. 
- अनिल भिला पाटील, कांदा उत्पादक शेतकरी,कहाटूळ